Pueblo di Aruba ta cuestiona solidarismo di nos gobernantenan

3953

MEP a critica dialogo social pero awor ta impone riba pueblo y sindicatonan y no kier demostra solidarismo cu contenido. Den e dianan aki e palabra solidarismo ta hopi den boca di mandatarionan y di nos ciudadanonan. Loke ta sosodiendo cu nos pais ta un desgracia di un nivel cu nunca Aruba a yega di conoce cu consecuencianan drastico pa nos economia, finanzas publico di nos pais y e situacion social-economico di famianan di Aruba. Ta hustamente den e momentonan dificil aki bo lo spera cu nos gobernantenan lo pone man na nan curason y haci un diferencia real.

Segun gobierno, por spera cu un grupo di alrededor di 25 pa 35 mil persona por perde trabou door di e crisis ocasiona door di COVID19. Nos propio gobernantenan ta declara cu e ta necesario pa tuma decisionnan radical pa zowel yuda gobierno mantene e impacto y pa yuda esnan den sector priva sobrebibi e temponan dificil cu lo bini padilanti. Gobierno a introduci FASE, pero e proyecto aki ta uno hopi mal implementa lagando un grupo grandi di personanan afor di e circuito pa por logra haya un compensacion di 950 florin pa luna.

Por ehempel eenmanszaken y companianan chikito cu e Director so ta doño no ta bini na remarca pa haya ayudo. A laga varios tipo di compania cu ta sufri indirectamente door di turismo afor. Tambe a priva varios hende di sigui traha entrada door di implementa shelter ‘in place’ haciendo distincion entre escencial y no-escencial. No ta tur companianan no escencial ta bin na remarca pa haya ayudo. Esaki ta nifica cu di biaha bo por cay den pobresa. Esaki ta un di e ehempelnan cu a bay robes den tur sentido.

Un otro preocupacion ta cu gobierno no a haci nada pa alivia e peso di gastonan di utilidad di cada famia. Tur persona, aunke sin entrada, tin cu continua na paga awa y coriente pasobra gobierno no a pensa riba e detaye aki. Ta manera cu e Prome Minister a bisa habri bentanan pa aire pasa. Ta falta solamente pe bisa nos bay baña cu awa di shelo.

E Gabinete aki, cu ta wordo forma entre otro door di MEP, ta hustamente esun cu a critica dialogo social y awe ta mustra cu na un forma dictatorial kier dicidi kico e ta dispuesto pa entrega. Tur anochi e Prome Minister kier papia di solidarismo. Den mesun rosea nos ta bibando e realidad cu un persona lo haya 950 florin y e Ministernan cu nan Parlamentarionan ta bibando cu riba 9 mil florin pa luna. Asina aki nos kier papia di ta solidario? Riba dje ta pidi e trahado publico pa entrega pero ora di ricibi e condicionnan di e trahado publico esakinan ta wordo ignora. Pueblo sa dicon?

Pasobra MEP y nos Premier no kier ta solidario cu e ciudadanonan di Aruba. Nan kier entrega un pida pa despues bisa cu toch nan a entrega algo. Loke ta lamentabel ta e hecho cu e gabinete aki mes a yena aparato gubernamental cu e Gabinete Oduber anterior cu personanan cu ya tin 2 pa 3 fuente di entrada y awor ta protesta pasobra nan lo bay atras den entrada. Esaki ta solidarismo? Awor what about e famianan cu a hinca den gobierno cu salarionan astronomico sin cu ta hustifica pa e rol cu nan ta eherce den gobierno. Esaki ta solidario?

E problema di mas grandi ta cu Minister di Finansa ta pretende cu placa lo caba, pero si esey ta e caso dicon bo no ta dispuesto pa baha bo salario mas ainda pa pueblo di Aruba por paga Bo algun luna mas? Pakico sigui paga Bo riba 12 mil florin mientras cu tur hende rond na Aruba ta sufriendo? Dicon Parlamentarionan a rechasa pa entrega 1000 florin pero despues den un ley a opta pa entrega 800 florin? Tin algo sumamente robes cu nos representantenan di pueblo cu no kier demostra solidarismo cu contenido. Si Gabinete Wever-Croes y e fraccionnan den Parlamento no realisa cu nan ta abusando di pueblo den tempo di crisis, nan tin cu atene nan mes na e consecuencia durante eleccion 2021!!

Francisco Figaroa