Reclassering Aruba tin e proyecto di “mentorenproject” desde 2014 pa hobennan entre 16 aña y 25 aña cu boluntarionan di comunidad. E ta un proyecto unda e boluntarionan ta bira mentor di un hoben cu ta bou di guia di Stichting Reclassering en Jeugdbescherming Aruba. Nan lo ta yudando e hobennan realisa nan metanan.
Door cu e “mentorenproject” di Reclassering Aruba ta dunando bon resultado, e ta un di e 12 nominadonan pa gana un di e 3 premionan di “Appeltjes van Oranje 2020”. Tin 2 proyecto nomina di Caribe y 10 di Hulanda mes. E “Appeltjes van Oranje” ta un premiacion anual di Oranje Fonds cu ta consisti di un estatua brons traha door di Prinses Beatrix y un suma di €15.000,- na 3 iniciativa social den Reino Hulandes.
Reclassering Aruba ta orguyoso di ta nomina p’e premiacion aki. E ta mustra e importancia cu e Proyecto aki tin p’e muchanan. Tambe e importancia cu e tin p’e trabou bunita cu boluntarionan ta haci den comunidad. “Appeltjes van Oranje” ta pone enfasis riba proyectonan innovativo treciendo dos grupo hunto cu normalmente no lo topa, pa saca e debil for di circulaciony trec’e bek den comunidad.
Pa esaki nan tin un campaña pa busca mas mentor cu ta haci e trabou bunita aki. Tambe Reclassering Aruba den colaboracion cu Caiso King Galloway Jr. lo lansa un jingle nobo di “mentorenproject”. King Galloway Jr. a sosene e proyecto aki desde comienso p’esey a acerc’e pa yuda cu tanto e jingle como campaña.
Dia 9 juli lo tin e live streaming pasobra na mei nan mester a bay Hulanda pa mira kende lo haya e premiacion. Door cu nan no por a biaha Oranje Fonds a dicidi di haci e live streaming, di cual lo pasa e 12 proyectonan. Aki Reina Maxima lo anuncia e proyectonan ganado.
