Minister dr. Rudy Lampe no tabata disponibel awe tardi na final di e reunion largo pa aprobacion di cambio di leynan contra abuso sexual. Un total di 20 miembro di Parlamento a aproba e cambionan di ley den forma unanime. Hasta 4 mocion cu a presenta durante e reunion a pasa unanimamente. Cu e cambio aki awo, a aumenta e castigonan di casonan pedofiel y a elimina e opcion di “verjaring” riba algun di e delitonan aki.
Remarcabel ta cu despues di e reunion, a purba haya comentario di Minister dr. Rudy Lampe, specialmente mirando e retonan cu e ta sigui confronta den enseñansa. Pero e mandatario a sali den pura y a splica cu e no por papia sino e ta perde su lift. El a haya un “cabes di boto” cu miembro di Parlamento Daphne Lejuez, pa e por a yega cas.
Relaciona cu e reunion, ta asina cu e nivel tabata aceptabel y Parlamentarionan a mantene nan mes al caso. No tabatin mucho discusion of polarisacion. Por a sinti cu tur Parlamentario ta di acuerdo cu e aumento di castigonan, specialmente si tene cuenta cu e tendencia den aumento di casonan di abuso sexual, no solamente entre muchanan pero tambe cu adultonan.