Apesar di e cambion a ultimo ora, personahenan di mundo di farandula, y tambe pueblo, a despedi di e canta autor Arubiano Vicente Kelly.
Pa 7’or di anochi e corteho funebre a yega Sporthall na Santa Cruz y poco-poco e hendenan a cuminsa yega pa despedi di Kelly, kende su composicionnan tabata hopi popular bou di e pueblo.
Manera ta conoci, Gobierno por medio di Departamento di Cultura a dicidi di rindi homenahe na Vicente Kelly organisando un tributo na dje. Esaki ta loke a tuma luga awe nochi.
Aruba su gran cantante y genio tocador di acordeon, Vicente Kelly, a fayece den fin di siman tras di lomba. Riba e combinacion di foto por mira algo di e tributo haci na Kelly.
“E Cantor di Pueblo”, considera como Aruba su Leyenda Viviente Musico, Embahador di nos Musica Cultural a marca historia na 1994 representando Aruba cu su orkesta “Los Pimentosos” durante e prestigioso Festival di Vallenato na Valledupar, Colombia.
Durante su trayectoria musical formando parti di su tres orkestanan Los Juveniles, La Nueva Fuerza y Los Pimentosos, Vicente Kelly a produci cancionnan cu a bira hitnan inmortal manera entre otro: “Mi Sonjo”, “Polin tin 7 buraco”, “Den Scochi bo Mama”, “Mi Chalapi bieu” y mucho mas.
Cu e cancion super clasico “Mi Banana” hunto cu e cantante Willy Polanco, Vicente Kelly y La Nueva Fuerza a conquista logronan internacional, cu te hasta e popular merenquero dominicano Fernandito Villalona a reproduci y a cosecha un exito grandi rond Mundo. Tambe e hit inmortal “Den Scochi bo Mama” a ser reproduci pa Doble R y a bira un super hit rond Antiyas.
Famia
Vicente Fortunato Kelly a nace dia 21 di januari, 1951 di mayornan Bernadina Brete y Dominico Aguston Kelly. El a nace y crece den bario di Paradera y ta bin di un famia di nuebe ruman, y e tabata e di seis ruman. El a casa cu sra Elvia Elizabeth Werleman naci dia 6 di november, 1955 y a casa dia 8 di october 1982. Di e matrimonio aki a nace 4 yiu Reynold, Maureen Carolina, Elton y Ariane Angelique. Tres di su yiunan ta cantante y dos di e yiunan homber ta specialisa den audio y zonido.
Vicente por a logra exitonan internacional, pero nunca a pasa den su cabes pa bay sigui un carera internacional y laga famia atras. E amor pa famia tabata demasiado grandi.
El a cuminsa hopi jong, pasobra su rumannan tabatin un banda cu yama “Estrellas del Campo” y prome cu esey e tabata den Blancas Palomitas.
Tabata su tata cu a cumpra un acordean p’e, un instrumento cu a duna e toke special den su produccionnan musical. Cu su diescuatro aña el a cuminsa toca den e banda te ora cu el a yega na un orkesta grandi. Cu su 17 aña (na 1968), el a lanta hunto cu Victor Oduber e banda “Los Juveniles”
E banda aki a existi pa diestres aña y a logra hopi exito. Vicente tabata toca acordean y orgel, instrumentonan cu nunca el a haya les pa siña toca, te ora cu el a lanta La Nueva Fuerza y a dicidi di tuma algun les di piano. Vicente un poco mas cu 15 aña pasa a keda diagnostica cu Alzheimer. E cuido na cas tabata un poco dificil y lo largo mester a pone den un cas di cuido, unda cu el a keda te fin di siman tras di lomba ora cu el a fayece.
Entiero di Vincente Kelly ta diasabra di 4’or pa 6’or di atardi.
