Den oranan laat di atardi e prome buelo a yega cu pashent abordo for di nos isla ruman di Corsou. Esaki ta un di e cinco pashent infecta cu Covid-19 cu a keda anuncia mas trempan y cu hospital na Aruba ta ricibi pa alivia e peso cu tin na Corsou pa brinda tratamento medico. E avioneta a yega na e pista di General Aviation caminda un Ambulance tabata warda cla pa e transporte.
Rapidamente tur esunnan involucra a haci nan respectivo tarea y den cuestion di minuut, e ambulance a sali rumbo pa Dr. Horacio E. Oduber Hospital. 24ora.com a confirma cu apenas algun ora despues e di dos vuelo a yega. Ta desconoci si e pashentnan lo sigui bin den transcurso di diasabra, of lo continua durante diadomingo.
