Manera a informacion a bin ta circula entre ayera y awe, ambos isla a yega na un acuerdo pa duna un asistencia den e momentonan dificil cu Corsou ta pasando aden pa loke ta e pandemia y nan capacidad di cuido medico.
Dokter Jerry Semper, coordinador di vacunacion na Corsou a duna di conoce na prensa cu un total di cinco pashent lo keda transporta den transcurso di diasabra atardi pa anochi pa ingresa den e unidad di Covid-19 di Dr. Horacio E. Oduber Hospital. “Danki na nomber di nos tur. Danki Aruba,” dokter a expresa durante un mensahe na prensa.
Dr. Semper a splica cu tin actualmente 66 hende interna den departamento general di Covid-19 na Curacao Medical Center. Diamars ultimo tabatin 33 hende den unidad di cuido intensivo, pero awo e cifra ey a subi na 41; cu ta di mas. Cu un tono preocupante, e profesional medico a indica cu e 41 persona aki ta nos ruman of nos bisiña. Su tras, el a duna di conoce awetardi nan ta mandando cinco pashent Aruba.
“Mes ora den nomber di nos tur y permiti mi papia den nomber di nos tur, pa gradici nos hermana isla Aruba pa nan habri nan porta pa nos, desescala nan trabou na nan hospital pa nan ricibi nos. Aunke esaki no ta straña nos pasobra nos ta ruman hopi aña caba,” tabata e palabranan di Dr. Semper.
Te cu ayera Corsou a registra un total di 3.761 caso active di Covid-19 cu un aumento di 337 te cu diabierna 2 di april 2021. En total tin 103 persona hospitalisa na Corsou, cual 1 ta di Boneiro y cu ta den cuido intensivo. Ayera a fayece 4 yiu di Corsou victim di Covid-19.
