Prome Minister ta anuncia retiro na CITGO Aruba

“Ayera ehecutivonan di Gobierno y di CITGO a reuni. CITGO a anuncia cu debi na ultimo sanccionnan cu Merca a impone riba Venezuela, nan lo mester retira varios trahado riba termino corto. Nos Gobierno mesora a pone contacto cu ehecutivonan nobo di e refineria pa evita esaki mas tanto posibel. Lamentablemente nos no tin tur cos den nos man debi na e situacion tenso y confuso na Venezuela”, asina Prome Minister mr. Evelyn Wever-Croes a habri diabierna informando di su reunion di ayera via di un mensahe whatsapp. Ayera Gobierno di Aruba a topa cu ehecutivonan di CITGO, despues cu e ehecutivonan a bula di Merca algun siman pasa caba den un esfuerso pa topa Gobierno pero a nenga di sinta cu nan pasobra no tabatin un afspraak.

Den su relato di e reunion di ayera, Minister Presidente Wever-Croes a sigui skirbi cu “Sinembargo nos lo sigui haci tur esfuerso posibel pa evita cu trahadonan local perde trabou y si nan perde trabou mes, atraves di instancianan laboral di Gobierno, lo percura pa nan haya un otro trabou cu prioridad. No ta facil, pero nos ta keda positivo cu nos lo logra”.

E sindicato IOWUA ta papia di por lo menos 40 trahado di CITGO cu lo bay cas e siman cu ta bin mientras cu a para contract cu mayoria di e contratistanan trahando den e refineria.

Mientras cu CITGO ta pasando den problema y ta kitando hende for di trabou, e mesun Minister Presidente ta tumando varios trahado nobo den Refineria di Aruba (RdA). E mesun compania cu tanto a critica su derecho di existencia, awo a converti den empleo pa entre otro un primo cu a comete fraude den Gobierno y un periodista masha ‘critico’ di e Gobierno aki.

Comments

comments