“Mi opinion personal y no tin nada di haber cu gobierno ni cu mi funcion: Arubadag tambe yena cu polemica atrobe. Prome cu mi a eherce mi trabao nobo semper mi a critica cu e placa cu ta ser gasta por ser hinca den enseñansa cu bo ta wak e cu nos mester di dje”, asina Edgard Vrolijk, Parlamentario pa Fraccion di MEP a vocifera riba su pagina di Facebook ayera. E ta reclama despues cu su mesun Gobierno a prohibi un artista pa presenta debi cu el a critica Gobierno den su calypso.
Mas leu Vrolijk ta bisa “Banda di aña, ganadonan di Caiso, Soca, Tumba y no solamente adulto pero mucha tambe mester bay y ganadonan di un canto pa nos pais grandi y chikito hunto cu un tipico. Mester caba e sistema di bay cu hala di banda y e placa ey nos por uz’e mas miho den educa y prepara e pueblo aki pa un miho futuro”.
Na final Edgard Vrolijk a bisa cu esaki ta su opinion personal y cu e ta sostene esaki na tur momento sin importa cua signatura tin ta goberna pasobra na final di dia e tambe ta un cuidadano di Aruba.
Edgard Vrolijk ta un educador y a laga scol pa subi lista di MEP. El a haya #15 riba lusts den eleccion 2013 y a logra 586 voto personal. Den eleccion 2017 el a haya #10 riba lista y a logra haya 749 voto riba su nomber. E ta di 10 candidato cu mas voto riba e lista di 29 candidato di MEP.
