Pa motibu di e desishon di Presidente di Venezuela, Sr. Nicolas Maduro pa sera e fronteranan entre su pais i Kòrsou, Aruba i Boneiru pa e próksimo 72 ora, Promé Minister Rhuggenaath a konvoká un reunion ku karakter di urgensia ku e Kònsùl General Venezolano djasabra 6 di yanüari pa 9’or di mainta.
Durante e kombersashon aki a indiká ku sera fronteranan di forma unilateral ta en pugna di tur esfuerso ku ta ser hasí pa fomentá i mantené bon relashonnan ku paisnan bisiña. Bon relashon ku paisnan bisiña ta algu ku nos pais ta konsiderá di sumo importansia. Entre Kòrsou i Venezuela ta eksistí relashonnan estrecho ekonómiko alabes familiar i kultural, entre otro e kolaborashon pa
operashon di e refineria.
Aktividatnan ilegal sin mas mester keda atendé kuné. Kòrsou, igual na e otro paisnan den Reino, ta atendé ku ilegalidat bou di konfiansa i nos ke traha den bon kolaborashon ku Venezuela den e lucha pa eliminá ilegalidat i kriminalidat.
Gobièrnu di Kòrsou tin kontakto estrecho ku paisnan den Reino tokante e desishon di Gobièrnu di Venezuela pa sera fronteranan te djamars mainta. Nos punto di bista ta ku e siere di fronteranan no ta kontribuí na yega na un solushon pa kontrabanda eksistente. Nos ta habrí pa deliberashon den kuadro di kooperashon pa kombatimentu di komèrsio ilegal. Te kaminda nos sa, nos por bisa ku e kooperashon entre outoridatnan di Kòrsou i Venezuela ta tumando lugá di forma korekto i konstruktivo.
E konsekuensianan direkto pa Kòrsou ainda no ta konosí pa motibu ku Presidente Maduro aparentemente a indiká ku lo no laga personanan ku ta di biahe keda tera. No opstante nos a tuma nota ku buelonan ta wòrdu kanselá.
Promé Minister Rhuggenaath a duna instrukshon pa vigilá e konsekuensianan di e akshon aki hopi di serka alabes pa tuma tur medida nesesario pa evitá problemanan relashoná ku siere di fronteranan. Banda di esei ta hiba kombersashonnan pa medio di kanalnan diplomátiko ku Venezuela pa yega na un solushon pa e situashon aki.
Kòrsou ya pa basta tempu kaba a subi e kontrolnan riba tráfiko di komersio.
Entre otro e asina yamá barkunan di fruta prosedente di Venezuela ta drenta nos haf riba dianan i orario fiho, di tal forma ku por ehersé kontrol mas mihó. Esei no ta ekskluí ku por tin kontrabanda, anto nos mester sigui lucha kontra di esaki.
Disidí pa sera fronteranan di forma unilateral no ta kontribuí na un solushon.
