Riba petishon di Minister Koenders di Asuntunan Eksterior na Hulanda, Promé Minister Sr. Eugene Rhuggenaath, riba 2 i 3 di novèmber 2017 ta enkabesá delegashon di Reino Hulandes na e konferensha di partidonan di tratado tokante Tratado di Koperashon den kombatimentu di komèrsio di kontrabanda den droga i supstansia sikotrópiko riba laman i den airu den region di Karibe. Esaki ta tuma lugá na siudat di San José, Costa Rica. Sr. Rhuggenaath lo partisipá tambe na e seminario tokante di e Tratado di San José.
E tratado di San José ta un tratado regional ku ta aspirá koperashon den region di Karibe asina promové kombatimentu di trafikashon di droga i organisashonnan kriminal transnashonal. Den e promé enkuentro aki partidonan lo elaborá riba e implementashon di e tratado den práktika i posibel puntonan di mehorashon den e implementashon di e tratado. Tambe lo trata fortifikashon di koperashon operashonal entre partidonan.
Durante e seminario tokante di e Tratado di San José lo para ketu na stimulashon di mas sosten pa e tratado bou di otro paisnan den Karibe. Lo diskutí e bentahanan di e tratado i lo indiká e efektonan ku kriminalidat transnashonal i kriminalidat relatá ku droga tin riba nos komunidatnan.
Mas aleuw, promé minister lo hiba kombersashon ku e outoridatnan di Costa Rica i miembronan di sektor komersial.
“Brigadier Generaal” De Vin di Marina Real i Warda Kosta, empleadonan di Asuntunan Eksterior (Hul.) i Direktorado di Relashonnan Eksterior na Kòrsou lo asistí promé minister.
