Diaranson atardi, ehecutivonan di Gobierno a tene un reunion cu ehecutivonan di Citgo y RDA. E ehecutivonan di Citgo a informa Aruba, despues di e ultimo anuncio di slowdown, cu awor aki nan tin miho noticia pa conta. Segun prome minister Evelyn Wever-Croes, nan a haci algun cambio interno y ta mira posibilidad pa sigui inverti den e refineria manera cu nan tabata haci’e prome cu e slowdown.
E problema grandi mes no a keda soluciona, esta e financiamento, pero ta optimista cu den algun luna nan lo haya e financiamentonan necesario pa completa e trabaonan pa keda cla ainda na tempo.
E bon noticia di esaki ta, si ta asina anto cu no mester kita ningun hende for di trabao awor aki. E noticia cu no ta asina bon ta cu ainda no tin un claridad, si nan a soluciona nan problemanan si of no y si nan por cumpli.
Di parti di gobierno, ta satisfecho cu tin un liña di comunicacion habri cu Citgo. Esaki ya caba ta miho cu na principio ora cu nan a drenta gobierno. Sinembargo Citgo no por a demostra nada substancial ainda. Nada cu prueba cu documento. Nan por a mustra si planes cu nan a adapta, pero cu plan riba papel, no ta ainda unda cu mester ta naturalmente. A palabra y e reunionnan a continua diahuebs y a continua diabierna. Citgo lo tene gobierno informa mientras cu nan ta busca solucion pa e problema grandi mes, cu e financiamento di e rehabilitacion cu tin cu tuma luga.
Nan ta kere cu nan por keda cla cu un alternativa pa esaki mas den curso di aña. Pa awo nan tin fondo pa sigui inverti locual nan tabata haciendo. Pa loke ta e slowdown cu nan a anuncia, no ta den e efecto mas.
Esey ta loke a keda discuti den liñanan grandi. E reunionnan ta andando ainda y ta keda pendiente, segun prome minister.
