Prome Minister Mike Eman, a reuni cu Henri Bontenbal, lider di partido y lider di fraccion di CDA, na Tweede Kamer na Den Haag. Durante e encuentro, nan a intercambia pensamento riba e importancia di conecta crecemento economico cu bienestar social y e responsabilidad comparti pa percura cu prosperidad beneficia tur ciudadano.
Eman a destaca cu CDA ta un di e partidonan principal den e coalicion di Gobierno Hulandes y cu AVP tin laso historico cu e partido cristian democrata. Segun e prome minister, Bontenbal tin un rol importante den Tweede Kamer, caminda e coalicion mester busca mayoria pa por aproba legislacion y presupuesto. Un di e temanan central di nan combersacion tabata e reto pa percura cu crecemento economico no keda refleha solamente den cifranan positivo, sino cu e progreso realmente yega cerca di pueblo.
Eman a splica cu e pensamento aki ta forma parti di e concepto di common good, of bon comun, caminda prosperidad economico mester traduci den un miho calidad di bida pa tur habitante. E prome minister a enfatisa cu e reto ta bay mas leu cu solamente un salario husto. Segun Eman, ta necesario pa apela tambe na e curason y bon boluntad di esnan den comercio pa contribui na bienestar di nos comunidad. Eman a destaca cu, banda di un salario husto, mester existi un mentalidad y disposicion pa comparti e prosperidad cu economia ta genera. E prome minister a expresa su preocupacion tocante e tendencia den diferente parti di mundo, caminda rikesa ta concentra cada biaha mas den man di un grupo chikito, mientras cu un parti grandi di pueblo ta keda atras.
Segun Eman, esaki ta un di e problemanan di e modelo economico actual y ta responsabilidad di e dirigentenan politico pa enfrenta e reto aki. El a enfatisa cu democracia y estado di derecho ta fortalece ora ciudadano sinti cu esnan cu ta goberna realmente tin nan interes y bienestar na pecho. E mandatario a referi tambe na e situacion politico na Francia, cu Hulanda ta sigui cu preocupacion. E prome minister a destaca cu ta importante pa evita situacion caminda pueblo ta sinti su mes bandona, particularmente ora ciudadano no ta sinti cu esnan cu tin mas recurso economico ta dispuesto pa contribui na un miho calidad di bida pa tur hende.
Eman a señala cu Aruba tin un tradicion di solidaridad y convivencia, y no por sinti falta di e balornan aki refleha den nos comunidad. Segun e prome minister, ta responsabilidad di politiconan y dirigentenan pa sigui apela na solidaridad y reuni diferente sector di comunidad rond di e obhetivo comparti di construi un miho pais. Pa Eman, e meta ta pa cada ciudadano sinti cu su preocupacionnan y necesidadnan ta scucha, mira y atendi, particularmente esnan cu mas mester di sosten.
E reunion cu Bontenbal a brinda oportunidad pa reafirma e pensamento comparti entre AVP y CDA riba e economia di bon comun, caminda crecemento economico, solidaridad y bienestar social mester bay man den man.
