Den un discurso nacional ayera nochi, Gezaghebber di Saba, Jonathan. G. A. Johnson, a declara cu Saba ta drenta un “Lockdown” completo relaciona cu e prome caso positivo di Coronavirus Covid-19 riba e isla.
Durante e ultimo simannan Saba a traha hunto pa preveni yegada di e virus. Aunke a tuma tur tipo di precaucion, Gezaghebber Johnson tabatin e tarea dificil di informa su comunidad cu entre e tres testnan efectua, un di nan a resulta positivo.
Desafortunadamente esey nifica cu Saba tambe awo a registra Covid19. E test positivo aki ta entre dos test cu a tuma di personanan cu sintoma. Ta exclui un pashent di Pheomonia cu nan sa di dje. Na e momentonan aki e persona cu a test positivo ta experenciando sintomanan leve y ta bayendo bon.
Mientrastanto ta en espera di e di dos resultado di e pashent na St. Maarten y tambe riba e di tres pashent cu nan a test. Ta considera e prome pashent cu a test positivo como un transmicion local, pasobra e persona aki no a biaha den e ultimo simannan.
E Gezaghebber a remarca cu tabatin varios medida caba na vigor desde 16 di maart, cu e intencion cu si acaso algo asina aki tuma luga,cu e transmicion lo ta limita. Pero mirando e acontecimiento nobo cu a presenta , lo implementa medidanan adicional pa contene transmicion di e virus.
Ta drenta na vigor, awe diadomingo 12 di april for di 12:00AM un Lockdown completo y obligatorio na Saba te cu por lo menos 2 siman. Cu introduccion di e medida aki ta tuma den consideracion e siguridad y salud di henter e comunidad. Na mes momento Gezaghebber ta menciona cu pa hopi esaki lo ta inconveniente pero necesario.
Lo duna informacion riba continuidad di servicionan escencial mas durante dia awe. Adicional, un yamada lo bay tambe na esunnan cu por tabata den contacto directo cu e pashent pa asina informa nan cu lo tin cu drenta den cuarentena obligatorio y cu lo monitoria y testnan durante e tempo cu nan lo ta den cuarentena.
Ta importante pa cumpli cu e medidanan tuma. Cuerpo Policial di Saba lo hunga un rol central pa sigura cumplimento di e Lockdown obligatorio aki. Tin cu sigui tur instruccion policial, como tambe sancion implementa na esunnan cu no ta cumpli cu e Lockdown.
Johnson a enfatisa, si acaso cualkier persona ta experencia problema respiratorio, pa no bay Hospital. Tuma contacto prome, informa di bo sintomanan y for di eynan lo ricibi instruccion.
Saba a tuma y lo continua cu medidanan cu e meta di proteha comunidad, pero lo ta efectivo solamente cu cooperacion di comunidad, cumplimento di cada un di nan y trahando hunto pa siguridad di un y tur.
