Durante e conferencia di prensa di MEP a puntra Edgard Vrolijk riba e nombracion di e directora di DPS. E punto cardinal tabata cu den un di e presentacionnan di sr. Rudy Lampe tabata poni cu kier a kita politica den e sistema unda cu bo ta bay cuminsa nombra hende, segun e hende su conocemento, hende su perfil, unda cu tin cierto scholing pa por cumpli cu cierto cosnan. Un di e puntonan ta netamente nombramento actual di e directora suplente di DPS, cu segun MEP ta contradictorio di loke Rudy Lampe minister di enseñansa mes a trece dilanti, pasobra e persona tabata miembro activo di e partido politico cu e minister. Ta netamente e punto cardinal aki cu kier saca completamente politica for di dje. Na e momentonan aki, ta netamente ta mancha locual cu e minister kier a presenta. Esey ta locual cu a haci pregunta, si esaki no tin di haber cu loke ta bay net contrario di locual cu e minister mes a trece dilanti. Esey pa MEP y pafo tambe ta caminda cu tin pregunta. Awe tardi lo tin reunion, entre e minister y tres scol. Fraccion di MEP tambe ta keda den contacto cu e docentenan y atende e situacion riba e nombracion di e directora y cambionan den DPS, como tambe nan preocupacionnan. Hopi di nan tin nan posicion fiha. A bisa si pa scucha minister, keda crea opinion y ora cu e opinion ta cla, cu na momento cu dicidi cu bo ta bisa cu no ta parti di esaki, MEP ta sigui sosten’e den loke nan ta haci. MEP su trabao ta pa sostene pueblo y para hunto cu pueblo. No por forsa un hende cu e ta sinti su mes comodo. Un di e puntonan mas importante pa loke ta e bringamento aki, ta ora cu bo tin cu tuma bo ontslag. Segun Edgard Vrolijk, na momento cu tuma ontslag, bo a perde tur derecho como ambtenaar, pasobra bo ta bay den un stichting. Ta comprendibel, pasobra bo kier un houvast. Pero e punto aki ta cardinal, ta caminda cu ta kitabo di e derecho como ambtenaar. Na momento cu bo tuma bo retiro, bay como stichting, bo no ta ambtenaar mas. Esey ta loke cu Vroljk a splica.

 

Conseho

MEP tambe a busca su consehonan rond. MEP tin su pensamento. Nan no a bin pa bringa cu ningun minister, ni core cu ningun hende. Nan a bin pa e parti husto ta cu loke e maestro ta pidi. Tambe lo husto ta, cu tin cu traha pa mehora enseñansa. Tin hopi cos eyfo pa haci, na luga di tres caos, desordo, problematica. Loke cu Vrolijk ta para pe, ta unda cu el a mira den hopi combersacion riba Facebook, unda cu ta para riba e aspecto di Good Governance. E ta un aspecto importante, pero no ta para den plan di gobernacion cu e mester bira bao di un stichting. E por diferente manera.

Por hinca un management team cu por controla. Tin diferente manera di haci e Good Governance cu no ta un stichting. Atrobe, e ta un escogencia. E minister ta pensa asina, e ta e minister. Pero MEP tin su parlamentarionan cu ta sirbi pueblo y para pa pueblo. Esey ta nan punto di salida y no a cambi’e ningun momento so. Nan ta keda para riba e mesun punto.

Pueblo ta dicidi si ta bay den stichting, ta bay den stichting y si e no kier bay den stichting, ta para cun’e tambe, segun Edgard Vrolijk.