E situacion di e holor di diesel a bira asina insoportabel cu sindicato a wordo yama pa un grupo di trahado, pasobra cierto area nan no por traha mas aden.
Hasta hospital a manda un comunicado cu Radiologia tabata cera. Por mira cu tin un situacion fastioso. E sindicato a reuni cu un grupo di trahado. Gina Maduro, presidente di sindicato ABV, a conta riba e situacion cu tin.
El a comenta cu diahuebs mainta tempran, empleadonan di departamento di botica a sali pafo, unda cu a yama presencia di sindicato y unda cu Maduro mes a bay eynan y e mes a tuma nota di e holo insoportabel cu bo no por traha aden. Esaki ta un problema cu ta andando pa basta tempo caba cu a cuminsa den camber di operacion. A sigui expande na e departamento di radiologia y awor aki e ta na botica, cu consecuentemente cu nan ta haciendo algun midicion. Nan ta reuniendo pa mira kico ta e solucion.
Mainta e problema a escala na e departamento di Botica, unda cu e trahadonan no por a traha mas y a sali pafo. Tin diferente keho caba, manera wowo ta kima, dolor di garganta, e holor insoportabel. Tur a meld ziek y a bay controla na Medwork. Mientras tanto, OK a cuminsa draai normal, pero durante operacion, e actividad tambe a wordo para pa e mesun motibo. Evacua pashentnan, caminda cu trahadonan tambe a baha. Awor aki ta solamente casonan di emergencia nan ta atende. Mayoria di nan a meldziek y a bay Medwork, pa registra tur keho cu ta hopi tempo caba nan ta trahando bao di e situacion aki.
Reaccion di gerencia
Maduro a sigui splica cu nan no a sinta oficial como sindicato hunto cu gerencia ainda, pasobra Maduro tabata bezig cu e miembronan. E ta sostene nan. El a bay cu nan Medwork y awor aki e hefe di departamento di camber di operacion a splica gerencia e situacion con e ta. Awor aki parce a haci midimento y tur cos ta mustra bon. Pero mester ventila pa e holo bay, pa despues operacionnan sigui. Mientras tanto e trahadonan si a meld ziek y a bay Medwork. E dienst ta draai so den casonan di emergencia.
Un problema
Esaki ta un problema hopi grandi pa soluciona, pasobra ta un construccion cu a tuma luga. Maduro a mustra cu esaki ta un problema cu empleadonan ta biba dia y anochi den dje. Con cu bay bin, ora cu a kies pa bin cu expansion di hospital y renoba y expande, esaki ta consecuencianan. Aunke bo ta bin cu un rapport pa purba di minimalisa e problema aki. Toch e ta bay for di control. Nan no tin control di tur e kehonan aki y cu tur e consecuencianan di esaki. Awe ta mira cu trahadonan tin cu traha bao di situacion cu no ta un situacion agradabel y inhumano pa traha. Nan ta keda bisa cu e no ta dañino. Pero sa cu aki cinco of dies aña, e ora ta mira ki daño realmente tin. Awo ta haciendo diferente meting y ta hayando diferente resultado. E trahadonan tin desconfiansa den cierto cosnan cu nan ta sconde informacion, mientras tanto laga e trahadonan traha bao di situacionnan asina. Trahadonan ta fada cu tur dia nan tin cu bay traha bao di circunstancianan asina. E no ta saludabel ni pa trahado ni pa pashent. Pashentnan ta bin un rato y bay, pero e trahadonan tin cu keda continuamente den e situacion aki.
Radiologia
Pa e mesun motibo radiologia a wordo evacua. E trahadonan tambe a meld ziek, unda cu a bay Medwork. A traha solamente pa casonan di emergencia, CT scam y MRI a sigui draai. Awe diahuebs, a reanuda trabao. Te asina leu, segun Maduro, ta draai normal na Rutgen.
Cambio
Por mira cu tin personal for di afo. Nan ta bezig cu meting y mira con por soluciona problema. Esaki ta un problema cu no ta di awor aki. Cu ta solamente den bista di e trahadonan di hospital, ta escalando.
Decision
Di parti di sindicato, a tuma contacto cu minister di Salubridad y pone na altura. Trahadonan di OK mes a manda carta pa e minister concerni, pa pone na altura. Sa cu riba nivel halto, nan ta bezig y cu e ta sinta na SOGA awor aki, pa cuminsa busca un solucion pa esaki, pasobra hospital practicamente ta e facilitador. Nan ta haciendo uzo di e edificio, nan no ta doño. Ta entre gobierno y SOGA y nan tin cu yega na un solucion pa e trahadonan. Te awor aki ta departamentonan crucial.
Maduro ta spera cu e problema aki no ta sigui escala bao di otro departamento. Ya ta tres departamento ta pasando bao di e situacion aki.
