Den un conferencia di prensa extra ordinario awe tempran, presidente di Parlamento Ady Thijsen a haci un anuncio. Esaki ta cu a hala e mocion di desconfiansa contra Marisol Lopez Tromp y e otro mocionnan di e famoso reunion diahuebs dos siman pasa aden.
EL a cuminsa pa bisa cu e decision pa duna Marisol Lopez Tromp retiro ta un hecho. Sinembargo a keda un discusion den comunidad riba e mocion di desconfiansa si e ta legal of no. E ta algo cu ta prome biaha a sosode.
El a bisa cu e keda para riba e interpretacion cu e tabatin. Mirando tur loke el a causa, e ta bisa mester tin trankilidad. P’esey e ta laga su decision un banda y a dicidi di trek in e mocionnan y declara nan nulo. Esaki ta den cuadro di interes general, trankilidad y stabilidad. E rechtzekerheid di instituto di Parlamento mester salvaguardia na tur momento. “Mi ta un politico responsabel y mi opinion mi mester pone un banda. Mester bin trankilidad y siguridad pa pueblo sigui kere den su parlamento.”
El a bisa na final cu mester sigui dilanti pasobra e situacion cu Aruba ta aden, no ta permiti pa sigui cu e tipo di discusion- y cuestionamentonan aki.
Pa loke ta e denuncianan cu el a haci, nan ta keda. Eseynan e no a hala aden.
Mescos cu mi ta haci mi esfuerso pa soluciona problemanan, manera abuso di muchanan, lo mi sigui traha riba e temanan aki. Tur esnan cu tin prueba di actonan penal cu cierto hende a haci, sea minister of parlamento, a yega momento pa hiba esaki na ministerio publico. “Mi ta duna di mi banda pa bini claridad di mi banda riba e temanan aki.”