Djaweps 19 di òktober 2017 a tene un presentashon den ouditorio di Kámara di Komersio
di Kòrsou titulá „Trabou orientadó pa restourashon na skol‟ (Herstelgericht Werken op School).
Un presentashon organisá pa Ministerio Públiko (OM) Kòrsou, Ministerio di Desaroyo Sosial, Labor i Bienestar, Ministerio di Hustisia i Stichting Ambulante Justitiële Jeugdzorg Curaçao (AJJC) ku huntu ta forma e „kerncommissie herstelrecht‟. „Trabou orientadó pa restourashon na skol‟ ta un aplikashon práktiko di Hustisia Restorativo (Herstelrecht/Restorative Justice) den kual, mas tantu ku ta posibel, ta trata na restourá e klima sosial di un forma pasífiko. E programa ta ser apliká den vários ais pa drecha e relashon na skol. E ta ser apliká kontra tentamentu, kontra atendé na skol (schoolverzuim) òf pa solushoná problema entre alumno i dosente. Ta trata di un aplikashon ku tambe ta ser usá komo intermediashon entre sospechoso i víktima òf na momentu ku un alumno a bin ku un arma di kandela skol òf a kousa un otro insidente. E ta dirigí riba gruponan di alumno pero tambe pa henter skol i ku partisipashon di mayor.
E instansia gubernamental na Boneiru, Centrum Jeugd en Gezin, a tene na Boneiru resientemente un kurso di 2 dia di Herstelgericht Werken op School. E funshonarionan di e instansia awor ta muchu mas mihó prepará pa duna yudansa na skolnan i otro servisionan edukashonal. E presentashon na Boneiru tabata na enkargo di Fundashon ECHO. Chris Palm, direktor di Centrum van Jeugd en Gezin di Bonaire i Jan Ruigrok, partner den fundashon ECHO i alabes trainer/coach for di Rottedamer a duna un presentashon na esnan presente. Ambos a bin for di Ualnda spesialmente pa e presentashon. Ministerio Públiko (OM) Kòrsou ta sostené e proyekto„Trabou orientadó pa restourashon na skol‟. Ta trata, segun Fiskal-mayó Heiko de Jong, di un proyekto pa hasi nos sosiedat mas seif. “Un proyekto intermediario pa evitá mas kaso den korte. E ta hasi nos komunidat mas seif i mas harmonioso”, di akuerdo ku De Jong durante e presentashon. E enkuentro na Kòrsou ta komo preparashon di e „Siman di Hustisia Restorativo‟ di 19 pa 26 di novèmber 2017.
