Pa mas cu un ocasion caba, sa mira presencia di un of otro truck di chica pos na un of otro dam na Aruba. Na Noord, esaki tambe ta e caso.
Den e caso aki, a mira tambe den oranan di mainta diaranson, con e trucknan aki tabata presente na e dam di Noord. Hopi biaha a yama polis caba pa e tipo di presencianan aki na dam, pero ora cu polis yega, nan ta bisa cu nan no a bin basha awa, sino chupa awa.
Toch asina mes, e hendenan ta keda atento y ta keda yama. Miedo cu nan tin ta cu porta ora cu hink’e den awa por tin sushedad. Pasobra ta hosenan cu ta manda den pos ta hincanan den dam, pa chupa awa, si ta e caso cu ta awa nan ta chupa.
Ta bisa cu nan no ta basahando awa. Mas bien chupa awa pa hib’e un caminda. Awa cu agricultornan ta uza pa planta, nan ta bin chupe y hib’e otro caminda of haci otro cos cun’e.
Ta preocupante, mirando cu e hendenan toch ta atento mirando e movecion di e trucknan di chica pos rond di dam.
Diferente cunukero, hopi di nan hende grandi, ta yega eynan y nan ta topa cu truck. Nan ta reclama e chauffeurnan ora nan bay coy awa. Finalmente nan ta disgusta y ta bay. E hecho aki ta kibra tur nan moral di planta cu tipo di awa asina, ora nan mira un truck di chica pos para eynan.
Den pasado a yega di gara hende ta basha awa den dam of den mondi. Pesey e hendenan ta yama. Awor aki e bisiñanan ta poco disgusta tambe cu ora nan yama polis, polis no ta bin tampoco. Esey ta pone nan haya un disgusto. Pero pueblo ta atento.
