Libertad den media publico, unda lo por critica organisacionnan poderoso caminda cos fout ta pasando ta un parti cardinal di un sociedad democratico. Esaki ta un di e partinan mas grandi den indexnan manera e “Press Freedom Index”.
Corupcion y fraude ta cosnan cu ta pasa den cada pais, manera, por ehempel, cu e famoso “Bouwfraude” na Hulanda caminda companianan grandi di construccion y ambtenaar halto di gemeente a colabora den un manera sumamente dubioso pa enrikece nan mes pa añanan largo den un di e fraudenan mas sofistica den full historia di Hulanda. Na tur pais cosnan asina ta pasa incluso na Aruba, unda lo tin sigur lo tin cosnan cu “no mag di wak luz di dia”.
P’esey pa full pueblo e ta importante cu tin un plataforma bon organisa y profesional cu por publica casonan asina y trece na luz y na mesun momento ta proteha e identidad di e “klokkenluider”.
Un fayo masha grandi mes riba nivel di ley ta cu ainda no tin ningun, pero ningun proteccion huridico pa proteha klokkenluiders. E ley a bay Parlamento di Aruba, pero te awe nunca a tende nada mas di esaki. Un set di ley pa proteha esunnan cu tin e curashi profundo pa yuda pueblo door di mustra cosnan sumamente dubioso na e nivel mas halto, ta algo esencial pa nos pais su democracia florece.
Na otro banda e reto grandi ta pa media. Un plataforma di klokkenluiders mane “Follow the Money”, cu ta mundialmente conoci pa nan exposenan, ta un organisacion sumamente sofistica cu hopi experticio in-house. E problema mas grandi pa e redaccion di un plataforma asina ta pa verifica y analisa tur e datonan cu e klokkenluider duna pa wak si e ta klop y ta berdad.
Atrobe leynan na Aruba falta. Na pais manera Merca tin e “Freedom of Information Act” caminda media oficial mag di solicita tur informacion cu no ta di siguridad nacional pa haci research over di un topico. Na Aruba, ni Parlamento ta informa riba pedido di informacion.
Pa proteha e identidad di un persona tin tur sorto di herment digital hopi sofistica awendia cu solamente instancianan mane AIVD lo por hack, gewoon accesibel na organisacionnan pa prijs rasonabel.
Awe no tin ni plataforma of ley pa yuda esnan cu ta wak cosnan fout den nan organisacion. Naturalmente niun hende lo kier perde nan trabou y pensioen y p’esey ta keda keto, mientras e actonan dubioso ta sigui.
E ta mi speransa cu Parlamento di Aruba y medio en general pensa riba e topico aki.
