Prome Minister mr. Evelyn Wever-Croes a anuncia flexibilisacion di medidanan cu lo drenta na vigor entrante dialuna 14 di december. E cantidad di casonan cu tin awe na Aruba, ta nota cu e siman aki a conoce un averahe di 12 caso nobo pa dia. Esaki ta un 10% positivity rate, dus di e cantidad di testnan cu ta wordo haci 10% ta positivo. Lamentablemente tin 46 persona cu a fayece y cu tawatin e virus aki. Na hospital tin 10 persona interna. Ora mira e cantidad aki por bisa cu ta manehando e crisis y ohala por mantene asina aki, Prome Minister a subraya.
Siman pasa a anuncia medidanan nobo pa motibo cu tawatin un crecemento den e total di casonan pa dia. Na momento cu e casonan pa dia aumenta, pasonan mester wordo tuma pa frena. Despues di e cambionan aki, por nota miho resultado y como
consecuencia a revisa e medidanan y haci cambionan pa flexibilisa.
E cambionan ta lo siguiente:
- Musico: Musiconan cu ta toca den banda paden den un establecimento por bay te cu 5 persona riba scenario y si ta pafo te cu 10 persona. E demas di reglanan a keda igual. E musiconan ta keda responsabel pa para e musica na momento cu e personanan ta lanta balia.
- Deporte: Deporte por cu publico, si ta paden ta 30 persona y si ta pafo ta 60 persona. Aki tur regla di tapaboca y distanciamento ta sigui na vigor. Un apelacion ta bay na tur esnan cu ta bay mira weganan, pa keda trankil sin bira emocional y cuminsa papia hopi duro of grita cu por cuasa riesgo. Na tur e personanan aki: aunke ta bisti tapaboca toch purba di wanta e emocion poco y no bay over na grita duro pasobra esaki ta riesgoso.
- Personanan cu ta drenta tienda y supermercadonan of otro establecimento: Aki pa famia por bay 2 adulto y muchanan bou di 15 aña. Dus un mama y tata cu 2 yiu bou di 15 aña lo por drenta un establecimento hunto. Si e muchanan ta riba 15 aña, e no lo por drenta cu mama y tata pasobra esaki ta considera 3 adulto.
E flexibilisacion di e medidanan aki lo wordo implementa den e siguiente decreto ministerial y lo drenta na vigor entrante dialuna 14 di december.
