Resientemente mi a tuma nota ku e Minister di Reino pa Asuntunan Eksterior sr. Stef Blok a duna di konosé ku durante e próksimo kumbre na Union Europeo dia 15 di òktober próksimo e lo trese dilanti e situashon di e fluho di imigrantenan Venezolanonan ku ta yega Kòrsou i Aruba pa motibunan interno di e pais.
Pero den mes un rosea tambe ta papia di insentivá sanshonnan kontra di Venezuela pa motibunan humanitario ku lo afektá e relashon entre Venezuela i Kòrsou. Kon por ta posibel ku Hulanda/Reino Hulandes ta bai buta sanshon riba Venezuela pa motibunan humanitario pero na diferente okashon Hulanda ta nominá e personanan ku ta bin nos isla komo “economische vluchteling” i no komo refugiadonan pa motibu di situashon humanitario. Aktualmente Minister di Ekonomia sr. Steven Martina ta hasiendo su máksimo esfuerso pa yuda katalisá nos ekonomia pero e tipo akshonnan aki lo no yuda ku esaki sino nan lo yuda hasi e situashon aun mas difísil.
Ku lo ta resultá ku un situashon finansiero mas Grandi ku Minister di Finansa Kenneth Gijsbertha mester bai atendé kuné. Nos tur sa ku Venezuela i Hulanda lo sigui hasi negoshinan mionario di nikel (FONDEL )i di gas (SHELL) manera nos a bin ta mira resientemente sin importá e situashon interno di Venezuela i sanshonnan anteriormente buta pa algun persona klave di e gobièrnu aktual di Venezuela. Pero tambe nos sa ku esunnan ku paga e konsekuensia di sanshonnan aki ta pa Kòrsou ku tur konsekuensia ku esaki por trese pa nos pueblo.
Den kuadro di esaki Parlamentario sra Mc William a hasi Minister di Asuntunan General e siguiente preguntanan:
- Kiko Gobièrnu di Kòrsou por medio di bo persona ku ta representá Kòrsou ta bai hasi ku anunsio aki di Minister di Reino pa Asuntunan Eksterno sr. Stef Blok?
- Gobièrnu di Kòrsou ta di opinion ku mester buta Hulanda responsabel pa kualke impakto negativo ku e sanshonnan aki por tin pa Kòrsou?