Port City ta un otro proyecto hopi imortante pa pais Aruba, segun Minister Dangui Oduber. Na momento cu a muda e waf di carga pa Barcadera, henter e area eynan a bin habri, cual ta 20 hectarea, cumpliendo cu deseo di comunidad.
A opta pa laga 12 hectarea di e 20nan disponibel habri pa uzo di comunidad, entre otro parkenan di recreo, boardwalk, botanical garden, espacionan habri pa comunidad por uza y solamente bay desaroya 8 hectarea di e 20 aki.
Menos di mita di henter area cu tin habri, cual ta sumamente atractivo pa desaroyo, mirando cu e ta canto di lama (waterfront). Tin hopi interes den esaki. Pero door di e preocupacionnan cu tin den comunidad pa mas desaroyo y mas hotel, a opta pa desaroya solamente 8 di 20 hectarea y bay den estilo, manera cu a indica, conforme vision y maneho di e gobierno, estilo boutique hotel.
No mester tin e preocupacion cu lo bay bin hotel grandi of condominiumnan grandi eyriba, sino lo bay tene e desaroyo hopi chikito eyriba, pero di un calidad hopi halto. Kier crea un esfera unico na Aruba di estilo di bida.
Aruba ta conoci pa repeat visitors pa hendenan cu a cumpra timeshare cu ta keda bin Aruba pa decadanan largo. Sinembargo tur e turistanan aki ta birando grandi y kier cater e mercado nobo di turista. E turistanan hoben, cu kier un otro experiencia, cu kier experiencia autenticidad.
Ta pesey e proyecto manera cu a bin wak di e Electronic Bikesnan aki ta asina importante pa keda mantene bo mes competitivo di e demanda cu tin bao di e hobennan. Aruba su turismo ta bezig ta transforma.
Aruba ta keda haya bishitantenan di edad mas avansa, cu ta doño di timeshare. Pero awo ta bezig ta evoluciona pa esnan cu tin edad mas hoben, cu tin otro demanda cu e turistanan di edad.
E turistanan cu tabata bin, tabata drumi riba beach y ta keda contento. Awendia e turistanan hoben kier hoben experiencia. E kier come cuminda autentico, kier papia cu local, kier wak kico tur tin na atraccion na Aruba. Ta pesey Port City ta asina importante.
Ta pa e motibo aki tambe a drecha Bushiri Beach. A amplia esaki, pone santo blanco, kier crea facilidad, kier pone landscaping. Kier embeyece e areanan di parkeo, pa por shift tambe e turistanan crucero, cu na e momentonan aki hopi di nan ta bay Eagle Beach, pa nan bay Bushiri.
Nan ta baha for di e terminal di crucero, via e boardwalk cu lo bay traha, nan por cana bay Bushiri Beach. E ora no tin e presion mas riba Eagle Beach. Antes e presion tabata na Palm Beach. Awo e presion a shift bay Eagle Beach.
Ora wak dos of tres crucero aden, cuanto hende tin na Eagle Beach. Logicamente hende lo keda bay. Na momento cu tres crucero grandi aden, ta papiando di casi 10 pa 12 mil turista riba Aruba.
Tin hopi plan ambicioso pa loke ta APA. Ta bay drecha e Welcome Plaza. Ta bay upgrade e terminal crucero y dentro di poco lo anuncia na comunidad un plan hopi ambicioso hopi atractivo cu ta den e proceso di negociacion pa firma un MoU cu un grupo cu ta interesa pa bin cu un desaroyo unico na Aruba.
E minister no kier a delanta riba e anuncio aki pasobra no a finalisa pa yega na un MoU ainda. Pero sigur Port City lo bira un proyecto importante, poniendo enfasis riba esaki, cual lo bira un inversion di sector priva y no di gobierno, di casi 500 miyon dollar.
E ta un proyecto lo bay dura entre 5 pa 15 aña. E proyecto ta bay cuminsa, ta spera, e aña aki y sigur lo bay tin 15 aña mas pa e proyecto aki sigui desaroya. Logicamente no kier yega desaroya tur cos den e prome aña. Tin cu plani’e bon. Mester percura pa organise bon y ehecut’e bon.
Esey ta e ultimo area cu ta keda habri na Playa pa un desaroyo. Pesey no kier comete ningun eror pa loke ta Port City.
