E pasahero deteni pa motibo di a haci un menasa di bom, a duna di conoce cu ta un “joke” el a haci. Awe rond di 3:00pm a drenta un bommelding na Aeropuerto, specificamente den e area unda ta busca Bo maletanan prome cu Bo pasa Migracion Mericano, conoci como e US CBP reclaim area. A detene e pasahero encuestion y a laga saca su maleta pa un control riguroso.
Debi na e menasa aki, Aeropuerto a paralisa su operacion mesora, precisamente riba e dia mas druk di siman, esta awe diasabra atardi. Centenares di pasahero a keda para pafo den solo wardando pa por sigui cu nan vuelo, mientras otronan a spanta y opta pa no biaha mas awe.
E ekipo special di Polis cu ta investiga casonan di “bom” a presenta mesora na aeropuerto y nan a controla maleta di e pasahero. No a dura hopi pa nan a confirma cu no tabatin nada particular den e maleta y cu e menasa di bom a resulta falso. E pasahero mes a declara na Polis cu ta un chansa el a bay haci den Aeropuerto.
Pa 4:10pm a reanuda operacion normal bek na Aeropuerto. Mester menciona cu e proceso di yegada a sigui opera normal, ta e area di salida a stop operacion y wanta pasaheronan pafo.
Na un prome instante a pensa di desvia e vuelo di KLM y TUI pa un otro isla debi cu no tabatin espacio pa nan para riba pista na Aeropuerto. Pero, danki na un esfuerso grandi di tur empleado y partnernan envolvi cu operacion di Aeropuerto, cu a logra saca e vuelonan pendiente lihe y asina por a traha espacio pa e dos avionnan grandi aki por a yega y baha nan pasaheronan normal.
