Diabierna atardi gerencia di WEB hunto cu demas invitado na e planta, a celebra e hecho cu nan a cumpli cu un logro mas den e ehecucion di e proyecto RECIP fase IV, situa cerca di e planta di energia cu ta consisti principalmente di boiler y turbinanan, cu tanto a caracterisa e decadanan pasa.
Den su discurso, Luis Oduber, Director di WEB a bay bek den pasado, caminda cu el a mustra cu na 1958, nan a produci e prome Mega Wattnan pa e isla di Aruba. Na e momento ey di produccion, awa y energia tabata inseparabel y mas complementario.
Awe, 62 aña despues y cu e introduccion di tecnicanan mas eficiente y sostenibel, e procesonan di produccion di awa y energia ta menos dependiente di otro.
WEB Aruba ta orguyoso di afirma cu en linea cu e futuro premira pa un Aruba mas limpi, ecologico y liber di combustibel, tur esfuerso, iniciativa y proyecto den e ultimo decadanan a orienta na alcansa e combinacion optimo di energia renobabel y no renobabel, fuentenan pa un suministro di energia y awa confiabel, accesibel y sostenibel.
Oduber ta sigui relata cu nan prome encuentro cu tecnologia reciproco tabata na 1998, cu e ordo pa adkiri un motor RECIP di 6MW. Na 2006, WEB a encarga su prome planta di energia RECIP cu ta consisti di tres motor. Cu e introduccion di e tecnologia reciproco, WEB a embarca den su caminda pa e reduccion continuo di e consumo di combustibel.
Na e momento ey principalmente pa aumenta e eficiencia. For di e tempo ey, e creciente consciencia mundial pa preserva e medio ambiente a hiba nan pa enfoca no solamente riba reduccion di costo, pero mas importante, riba un operacio mas limpi cu menos emision di carbon.
Awe, e produccion di energia ta consisti den un combinacion di fuentenan di energia eolico y solar, motornan RECIP, turbinanan di vapor y lo ultimo di e generacion di boiler. E operacionnan ta sosteni pa diferente tecnologianan di almacenamento di energia y pronto, door di un sistema inteligente nobo di maneho, miho conoci como IGMS. Como resultado, consumo di fuel oil te cu awe, a reduci cu 40% y e penetracion di energia renobabel a aumenta na 18%.
E proyecto aki ta parti di e strategia di WEB, proyecta pa asina sigui reduci consumo di fuel oil cu 67%. Cu e finalisacion di e planta di RECIP IV na comienso di 2021, WEB ARuba lo drenta den un era nobo di operacion 100% cu tecnologia reciproco. Na e mesun momento nos lo bisa ayo na e boilernan y turbinanan di vapor, cu a demostra di ta hopi valioso durante e era industrial di siglo XX.
E planta nobo di RECIP lo tin un total di 102 MW di capacidad, consistiendo di 6 motor di RECIP, cada un cu un capacidad di 17 MW. E socio princpal den ehecuta e proyecto RECIP IV, ta Wärtsilä Finland Oy. Wärtsilä, hunto cu su partnernan Albo Aruba, CVC Construction & Management y Twentsche Kabelfabriek, ta na encargo di e ingenieria, adkisicion y construccion di e central di coriente.
E relacion di WEB y Wärtsilä ta extenso y durante e ultimo decadanan, e compania aki a sostene WEB exitosamente cu e plantanan RECIP den fasenan 1, 2 y 3 cu un total di 10 motor.
Na 2019 e ekiponan di WEB a cuminsa cu preparacionnan detaya di e construccion pa e planta RECIP IV. Esaki a wordo haci den un bon coordinacion cu entidadnan designa den ordo pa sigura adherencia y cumplimento di tur norma di construccion, ambiental y di siguridad.
E motornan y nan generator ta ancra riba un fundeshi special. Cu e fundeshi na su luga, por a procede cu e transporte di e motornan, cu ta pisa cada uno 300 ton, ekivalente na 60 elefante adulto, for di e puerto di Barcadera pa WEB Aruba, cual a tuma 2 ora pa move cada motor RECIP riba un distancia di solamente 2 kilometer.
Tur motor a wordo movi den 4 dia na december ultimo. Pa tin e motor y generadornan na e luga riba nan fundeshinan designa, ta un logro grandi pa e proyecto aki, segun Luis Oduber.
