Ta remarkabel ku te ainda hopi outomobilista no ta hasi uso di nan faha di seguridat na momentu ku nan ta kore un vehíkulo. For di mas ku mitar di e aksidentenan ku a tuma lugá den e promé mitar di aña 2019, a sali na kla ku e víktimanan no tabatin nan faha di seguridat bistí na momentu ku e aksidentenan aki a tuma lugá.
Esaki no ta konta únikamente pa esnan ku ta manehá un vehíkulo pero tambe pa e ko- okupantenan ku ta sinta tantu dilanti komo patras den e vehíkulo. Ku regularidat polis ta tene kontrolnan di tráfiko den kua pa medio di repartimentu di prosèsverbal, ta konsientisá e shofùr i ko-okupante di uso di nan faha di seguridat. Sinembargo, e responsabilidat primario ta keda di esun ku ta riska su bida den tráfiko dor di no bisti su faha di seguridat. Pa medio di e komunikado aki, Kuerpo Polisial di Kòrsou ke mustra komunidat riba importansia di uso di faha di seguridat i asina kontribuí na redusí e kantidat di aksidentenan, den kua uso di e faha aki por a evitá ku un persona por a risibí leshonnan ku por a lag’e keda desabilitá òf te asta pèrdè su bida.