Un rato pasa pa 8:00pm a manda patruyanan di polis pa yega Kamay 86-A. Bisiña a mira tres homber sospechoso den cura di un cas. Pa colmo e alarma di e cas a activa tambe, mustrando cu lo a habri porta of bentana di e cas sin cu e doño t’ey.
E compania di siguridad, Smart Systems tambe a yega den tempo record na e sitio, pa proteha e propiedad. Pero, mescos cu polis, no a topa e tres ladronnan mas. Locual si a constata na e cas ta cu a habri un bentana patras di e cas. A informa e persona encarga pa cuida e cas pa bin cera e bentana mesora.
Ta uza e cas pa huur cu turista. E doñonan mes ta biba afo y ta paga un compania na Aruba pa cuida e cas pa nan y huur cu turista, uzando e plataforma di AirBnB. Polis a patruya den e vecindario pa mira si por topa cu e tres hombernan aki, pero nada. Bisiñanan a keda di tira un miho bista den vecindario pa movecionnan straño y a keda di informa polis asina cu nota caranan “sospechoso”.
