For di marduga caba tin clientenan a forma fila na diferente compania pa probecha di prijsnan reduci, en conexion cu e promocionnan rond di “Black Friday”. Un tradicion Mericano cu a yega Aruba desde algun aña caba pero cu ultimo temponan ta birando un “trend” tur aña. Aunke cu e ta un evento puramente comercial, clientenan ta warda pa haci compras riba e dia aki, debi cu regularmente tiendanan ta baha nan prijsnan hopi mas abou cu normal.
Awe Mainta for di trempan a nota fila largo den Caya Betico Croes pa probecha di descuento na tiendanan manera Victoria Secrets. Pero dado momento e fila largo y clientenan nobo cu ta crusa pasa memey di e fila pa por yega mas dilanti posibel a bira un problema. Specialmente esunnan cu ta para eynan di ayera nochi caba no a aprecia cu otronan ta yega mainta fresco-fresco di nan cas y purba yega prome pa drenta y cumpra na prijs reduci.
Na dado momento, ora cu a habri porta di e negoshi, clientenan a cuminsa pusha pa drenta. Siguridad a purba tene e situacion bou control, pero un rato a sinti cu e situacion tabata bayendo for di man, pa cual a yama Polis pa brinda asistencia. E defensornan di ley a yega mesora den Caya Betico Croes y a splica e clientenan di e consecuencia si nan no por comporta nan mes.
Siguridad di e pacus a splica clientenan cu no por habri porta pa tur hende drenta pareu, sino ta permiti tanto hende drenta pa garantisa siguridad di nan mes y nan trahadonan. Pesey ta importante pa yega trempan pa por probecha di e miho ofertanan prome cu productonan caba. Polis a keda un rato na e sitio pa controla e publico y evita cu pushamento ta caba na bringamento, sin cu tin cumpramento y pio pagamento!
