Durante control den area di EPB Hato, patruya di Playa a para un Nissan March color shinishi. Esaki a tuma luga riba Caya Frere Alexius den careda di 1:45 pm cu ta orario cu ta basta druk banda di e dicho scol.
E vehiculo aki tabata para cerca di un snack den e area di e scol, pero na momento cu a tuma nota di e patruya, el a move mesora for di sitio direccion Caya Frere Alexius, cu a laga nan mustra sospecho inmediatamente. Na momento cu polis a para e vehiculo tabata tin tres ocupante aden.
E hoben chauffeur na stuur no por a presenta un rijbewijs, tambe tin di bisa cu e tabata mustra hopi jong y cu ta duna di pensa cu e no tin edad pa tin un rijbewijs ainda. Polis a detene na sitio. E hoben tabata compaña pa dos otro amigo, cu lo a keda na pia e momento ey. Despues di un control a encontra varios paki grandi di marihuana den e vehiculo parti dilanti. Esaki a nifica automaticamente cu a detene e otro dos hobennan den e vehiculo tambe, cu tabata tin intencion di bandona sitio.
A pidi transport pa presenta pa asina hiba e trio aki warda, como tambe takelwagen mirando cu e vehiculo tabata confisca. A cuminsa listra e auto mas profundo y pa nan sopresa a bin topa cu aun mas paki grandi di droga scondi den parti patras di e vehiculo.
Accion rapido di polis a duna resultado y captura bendedonan hoben di droga den area di scol. Ta keda awo na investigacion pa cera e caso aki.
