Aleluya Gloria na Dios, no laga nada destrui nos nucleo di Famia. Awel laga nos splica algo cla, pa tur hende compronde: E asunto di registracion di matrimonio di mesun sexo ta algo anticua, pasobra Emperador Nero di Roma cu a persigui y mata Apostel Pablo y Apostel Pedro y miles di Cristian tabata casa cu un persona di mesun sexo, segun historia, y tur persona di mesun sexo cu kier casa of biba ta bon na altura kico nan ta haci y kico nan kier, p’esey ta existi Democracia. E dolor ta e moralidad den Famia, con nos lo haci cu e hubentud y futuro generacion?
P’esey Dios a pone un dos versiculo den Bijbel pa nos tur cu ta ser humano riba e mundo aki y e ta conta pa tur hende riba mundo: Juan 3:16 y Galationan 6 vers 7. E dos versiculonan aki ta conta pa Cristian y no Cristian, sea cu bo conoce Dios, of no conoce, of bo conoce y bo ta rechasa Dios segun 2 Timoteo capitulo 3 ver 1 -5.
Laga esaki ta cla pa henter pueblo di Aruba, y pa nos tur sa cu nos no tin di hustifica nos mes cu fout di otro, pasobra na final cada ken tin di duna cuenta na Dios di su mes.
E pakete di ley ta contene hopi cos, pero pregunta ta con nos lo bay aplica e ley aki den cas di Famia, caminda moral y respet ta biba, pasobra aworaki e porta ta habri pa hubentud drenta rebeldia, y pa hende bira mas materialista posibel, pa manipulacion tuma un entrada mas grandi.
Pronto bo ta tende cu un hende ta drenta union civil cu un hende cu ta biba afo, y asina e persona aki ta haya derecho pa bin biba na Aruba, y tambe e persona aki lo tin derecho riba onderstand pasobra no tin trabao p’e. Union Civil lo permiti hende bende nan mes pa placa, sin tin amor ni tampoco ningun relacion, pero djis pa ta un trampolin pa maldad. y cuidao cu nos no importa malvado.
Union Civil ta habri porta pa tur sorto di registracion, e por duna chens pa hende rechasa e mandato di Dios, y no cana e caminda di Dios pa un matrimonio segun e palabra di Dios.
Union Civil ta pone matrimonio cu ta sagrado na baratio, e Famia cu ta e prome pilar di un pais, den decadencia, pasobra tur locual cu antes tabata wordo balora, awor no ta wordo balora mas, pasobra door di registracion, amor a disparce.
Na final di cuenta nos ta bay mira cu esaki lo bira e negoshi di añanan venidero, ya cu pa registra lo no costa un florin, pero dolor ta ora abo como mayor ta mira bo yiu drenta Union Civil cu un persona cu apenas bo conoce. Mi ta spera cu tur esnan cu a firma esaki lo ta consciente di locual cu nan a firma, pasobra ta facil pa bisa mi a firma pa un pakete di ley. Pero nos tur sa cu aworaki ta na moda pa firma despues ta lesa e contenido, pa firma y despues nos lo wak con ta haci, pa firma y laga e pueblo y e Famianan carga e consecuencia. Nos no por haci politica cu nos Norma y Balor Sagrado.
Bijbel ta spierta nos, pero awor a bira cu Bijbel ta un buki anticua, pero pa esnan cu tin consenshi y sa ken ta Dios, nos tin cu bisa cu Bijbel no ta jong ni bieu, pero e ta eterno.
Awor ta e tempo cu mas cu nunca nos tin cu para riba nos principionan, y wak pa nos famia, y no ta awe nos a bini ta splica nos pueblo cu nos ta bibando den tempo trabahoso , y cada ken tin di les’e pa su mes, pasobra locual ta sosode awendia no ta sorpresa , tuma tempo awe mes y lesa 2 Timoteo Capitulo 3 ver 1-5 y bo ta wak kico ta pasando, y esaki lo duna bo e motibo y rason pa busca mas di Dios.
Poco poco pero sigur e dia cu Señor ta bin busca su pueblo ta cercando, e dia ni ora ningun hende no sa pero e señalnan aki ta demostra cu nos mester ta prepara. Awor ta tempo pa demostra Amor pa hende compronde cu sin Cristo nos ta perdi, y pa nos por predica e Evangelio mas cu nunca, den tur Hogar aki na Aruba. Y Corda riba esaki Juan 3:16 y cu nos no ta bibando den guera, pasobra salbacion ta Amor y Cariño di Dios.
Sinceramente
Pastor Marcel Balootje.
