Famianan di Mabon y Brazil ta den un shock completo awe, despues cu tres siman pasa un criatura di apenas 8 aña di edad, cu awa na wowo, a conta su mama kico un famia a haci cune pa e ultimo añanan. Den un investigacion preliminar na cas, den seno di famia, preparando pa keha e burdugo na Polis, a bin descubri cu no ta un mucha so, sino ta tres diferente mucha sigur a bira victima di abuso sexual na man di e sospechoso Jaime Trimon di 52 aña di edad.
Update: DOW a informa cu a start un investigacion disciplinario inmediatamente den margen di LMA riba e sucedido y ta sali di puntao di bista cu tur empleado ta cumpli semper cu regla, norma y balornan stipula den e reglamento interno. Segun e investigacion di OM ta desaroya, DOW tambe lo sigui tuma e pasonan necesario contra e persona aki pa salvaguardia e integridad di nos organisacion y bienestar di tur colega.
E sospechoso ta traha pa hopi aña caba na DOW. Y ta precisamente cu e pickup di trabou e tabata pasa busca e muchanan y hiba nan su cas. E tabata busca e mucha muhe di 8 aña di edad pa yud’e cu su huiswerk y coba den su cabey pa problema di pieu. E mucha aki a sigura su mama cu ta for di tempo cu e tabatin 6 aña di edad a cuminsa abusa di dje, pero e no kier a conta ningun hende, debi cu Jaime a menas’e.
E dos otro victimanan tabata mas grandi, un di 11 aña y un otro di 14 aña di edad, tur ta mucha muhe. Tur a admiti cu e homber aki a mishi cu nan, den forma di fulamento y hasta penetracion sexual na nan parti patras, causando daño na nan curpa. E homber tabata uza su cas situa na Mabon pa comete e acto aki.
E mucha di 8 aña tabata protesta cu e wela constantemente, cu e no kier bay cu Jaime. Lamentablemente e famia no a capta e señalnan aki di e criatura, cu den su forma, tabata purba convence e famia cu e ta un victima di abuso sexual. Na mas di un ocasion a constata cu e mucha tabatin problema, dolor y hasta tabata sangra na su parti patras, pero nunca a imagina cu lo por ta algo asina. A pensa cu ta ceramento di barica e criatura tabatin.
Entre e tres victimanan di abuso sexual tin nieta y sobrina di e casa di Jaime Trimon. E mes tin 10 aña casa cu su pareha pero no tin yiu cune. El a probecha di e famia di su casa pa e haci e acto criminal aki.
Awe recherchenan di Jeugd en Zeden Politie a yega na DOW pa deten’e. Pa algun dia caba a tuma nota cu famia, den un acto di desesperacion, a cuminsa publica potret y nomber di e sospechoso riba rednan social, den un esfuerso pa haya husticia pa e criaturanan. Tabata haya cu Polisnan ta tarda mucho pa detene e abusado. Di otro banda, Recherchenan a splica famia cu nan ta depende di Fiscal na Ministerio Publico pa haya permiso pa detene e sospechoso y a haci un apelacion pa no bay riba Facebook cu e tipo di casonan asina.
Fuentenan den famia a sigura na nos cu Dokter a atende e victimanan, a haci e pruebanan necesario y awor ta pendiente pa Dokter di Polis cu e siman aki ainda lo atende cu e tres victimanan. No por descarta cu lo tin mas victima den e caso lamentabel aki. Mester menciona cu un di e mamanan di un di e victimanan, ta den shock keto bay y no ta ni trahando, despues di topa cu e realidad amargo aki cerca su yiu.
