Awe nochi pa mas of menos 9:00 pm polis a presenta na un cas situa den Maracastraat pa detene un sospechoso. Fiscal di Ministerio Publico a duna ordo pa detene Giomar Tromp, sospecha di tin di haber cu un caso di ladronicia.
Na un prome instante tabata mustra comosifuera cu e detencion lo no bay facil pasobra esunnan na e cas, situa den casnan di pueblo di Dakota, a mustra di no ta contento cu polis a bin detene nan amigo riba un pleno diabierna anochi. A pidi refuerso di mas patruya pa yuda controla e situacion na e sitio. Pero na final no tabatin mester, pasobra e sospechoso a coopera y a entrega su mes den man di autoridadnan na e sitio. A nota varios patruya na e mesun cas ey, pa asina sigura cu ni esunnan eynan ni otronan cu ta yega despues no stroba trabou di polis den cuadro di detencion di e homber.
A transport’e pa warda di polis na lama, conoci como strandpolitie, pa eynan present’e dilant un sub fiscal cu lo interog’e. E lo dicidi riba su detencion y encarcelacion pasobra entretanto tabatin un orden di detencion caba di parti di un fiscal di Ministerio Publico. Kico of unda Tromp a horta no ta conoci ainda, debi cu e investigacion ta andando y apenas e procedura penal a inicia.
