Tabata mas of menos un luna pasa, cu a adverti gobierno, cu si no haci nada urgente pa e dos edificionan original di Julianaschool y Beatrixschool, situa den George Madurostraat na Oranjestad, cu adictonan ambulante lo tuma over. E scol tabata cera y a nota cu a manda busca plywood pa cera e portanan y bentanan abou pa tene e scolnan liber di ladron y adictonan ambulante.
Pero, como cu no a haci nada, a nota cu entretanto a kibra e candalnan y ambos scol awor tin nan porta principal habri y e scolnan ta pa nan cuenta.
E bario den pasado a yega di experencia e mesun situacion aki caba, ora cu a bay laga e scolnan pa nan cuenta atras y cu adictonan tabata drumi den klasna cu hasta tabatin airco cendi 24 ora pa dia y tabata baña uzando awa cu tambe a keda conecta. E biaha aki por lo menos a percura pa desconecta coriente y awa pa evita maluzo, pero a laga e scolnan, di cual Beatrixschool ta considera un monumento, cu awor ta na disposicion di adictonan. Cu esaki e bario di Klip por spera problema un djis, cu aglomeracion di adictonan cu mesora ta yena e klasnan di e scolnan, cu cosnan horta y viesedad.
Mester menciona cu un luna pasa ainda Departamento di Infrastructura y Planificacion (DIP) di gobierno a sigura nos cu nan tin un plan serio pa huur ambos edificio. Parce cu un scol di medicina, cu su oficina principal na Canada, ta interesa pa huur tanto Beatrix School como tambe Juliana School na Playa. Gobierno ta spera pa keda cla cu un decision den algun siman mas. Parce cu e scol Canades ta kedando cla cu su “business plan” pa garantisa cu e cifranan lo duna pa por cubri e huur di e dos edificionan den centro di Oranjestad. Tambe ta tene cuenta cu mester renoba ambos scol, di cual un di nan tin retonan pisa cu asbest.
Ta como un decada pasa cu e scolnan no ta den uzo mas. Reina Beatrixschool a hay’e den problema cu asbest y gobiernonan, ainda, no tabatin sufiiente fondo disponibel pa por a drecha e scol. Un di e retonan ta e dak, cu lo mester reemplasa casi completo, mara na un inversion cuantioso. Na Julianaschool e problema mas bien ta e kolomnan di muraya cu a cuminsa kibra y ta forma un peliger di por cay den otro. Pa evita cu ta bin un desgracia serio cu alumno y docentenan eyden, a opta pa desaloha e scol completo.
Pero mientras cu gobierno ta buscando alternativa pa e edificionan, keto bay ambos scol ta situa den edificionan temporal wardando pa sea renoba e dos scolnan aki of construi di nobo. Tambe e bario rond di e dos scolnan ta teme cu si dura mucho, cu e scolnan lo por bira chollerhouse atrobe. Ta bisa atrobe pasobra den pasado caba tabatin hopi molester di adictonan ambulante cu tabata drumi anochi cu airco cendi den e scol. Ta despues di basta tempo a logra kita coriente, pa evita cu luznan ta keda cendi henter dia y den algun caso hasta airco.
Na un dado momento a nota cu a laga pone un cantidad di plywood na e scolnan, dunando indicacion cu lo tabatin intencion di tapa e portanan y bentanan di e klasnan abou, pa evita cu adictonan ta penetra den e scol. Bisiñanan a bira contento mesora, pero no a dura mucho cu e alegria a caba debi cu a bolbe kita e plywoodnan pone un banda. A mira algun hende canando den cura di scol ta inspecciona. Parce cu esey ta un compania cu a bin inspecciona pa por analisa e gastonan cu un reconstruccion di e edificio lo costa mas of menos. Tambe pa analisa con serio e problema di asbest ta na esun scol y e problema cu infrastructura di e murayanan na e otro scol. Ta e compania aki lo mester a manda su calculacionnan y un estimacion di e prijs di renobacion pa e scol por considera den su plan di negoshi.
Con leu e plannan aki ta, ainda no ta conoci. Hecho ta cu Aruba ultimo tempo a bira masha popular pa hobennan cu kier cuminsa nan estudio di medicina na un otro pais. Ta haci un parti den Caribe y e otro parti na nan pais mes. Asina por ehempel tin varios ehempel di universidadnan medico cu a establece riba nos isla, pero tambe na Boneiro y hasta na Saba. Parce cu e studiantenan asina ta combina studiamento hunto cu gana experiencia nobo den un otro pais y si e tin solo y lama, ta miho ainda. Pa nos isla e tipo di universidadnan asina ta trece oportunidadnan economico, pasobra tur e studiantenan mester huur apartamento, ta huur auto durante nan estadia, ta come y bebe tur dia y como tal ta aporta na nos economia. E impacto economico di scolnan grandi asina cu ta trece hende di afo ta positivo y ta parce cu gobierno kier explora e caminda ey awo den e pandemia aki.
