Cuidadano a bati alarma pa mascota den mal estado den cas na Papilon. Polis a presenta pa atende cu un cacho cu, segun bisiñanan, tin basta tempo descuida.
Diadomingo, band’i 11:00 am, polis a yega na Papilon 122-B na Santa Cruz pa situacion lamentabel cu un mascota tabata encontra su mes aden. Segun informacion, ta algo andando pa basta tempo caba, caminda cu mayornan bibando na dicho adres, a hayanan den problema cu nan yiunan y a tuma decision di bandona e cas y laga nan encarga.
Por a compronde cu e yiunan aki practicamente no ta na cas y cu ta pa e motibo aki a descuida e mascota. Ta papia cu e bestia tabata pasa sin come, sin awa y cu su situacion tabata basta delicado. Te hasta a bisa cu e lo tabata tin un pata kibra.
Bisiñanan tabata yuda e bestia y pasa laga cuminda p’e cada biaha cu nan tabata por. A bisa, cu a pidi ayudo na mas di un ocasion.
Na yegada, polis a tuma nota di e mascota y a pidi presencia di nan colega pa bin rescata e pober mascota aki. A transporta e bestia y ta spera cu pronto e por recupera di e maltrato cu el a pasa aden.
