Polisnan a bolbe atende cu esunnan di Fermin’s Bar na Boegoeroei riba nan comportacion durante Shelter in Place (SIP). Gobierno, Ministerio Publico, Alto Comisario di Polis Suplente etc, a anuncia na diferente ocacion riba locual mag y kico no mag durante e weekend di Siman Santo cu Pasco di Resureccion relaciona cu reglanan extra estricto di SIP.
Un di nan ta cu riba diabierna, diadomingo y dialuna bo mag sali cas solamente pa busca cuminda takeaway y bay cas. Tambe por bay botica, dokter of yena gasolin bin cas. A mustra bon cla cu no mag di bebe den bar. A mira diferente restaurant ta djis atende cliente na bentana ora nan bin busca cuminda. Of e empleado mes ta sali entrega e cuminda te pafo na auto y cliente ta paga. Nada di drenta bar restaurant pa busca cuminda.
Den e caso specifico di Fermin’s Bar, Polisnan a mira con tin bebemento cu cliente presente. Polisnan a atende cu doño di e negoshi. Segun el a bisa Polis, e ta bou di e impresion cu e mag di haci esey. Sinembargo Polis a splik’e cu e bar no mag ta habri pa hende sinta bebe. E tin un takeaway y esey por funciona pa busca cuminda solamente.
Mirando e diferencia di opinion, e Polisnan a pidi e doño pa compañanan y pasa Warda di Polis na Noord pa asina na placa chikito splik’e exactamente kico por y kico no por, den presencia di e superiornan tambe.
