Awe nochi pa 9:55pm un discusion amoroso a termina cu detencion den Rooiweg na San Nicolas. Un patruya di polis a persigui un auto marca Nissan modelo March color blanco for di Weg Fontein, pasa den Pastoor Hendrikstraat y bay caba den Rooiweg. Polis a constata cu e pareha tabata den un discusion pisa den auto y no tabata mucho cla si e homber a maltrata e señora den e proceso.
Ora cu porfin a logra pare e auto, e chauffeur masculino a bula for di e auto y a purba huy di e sitio. Pero, e no a conta cu polisnan balente lo sali su tras na pia y a logra gar’e mesora. A resulta cu ta e conoci di polis, esta “Cayman”. E victima a keda scondi atras den auto, pero polis a bay papia cu ne pa scucha di su banda kico a pas’e cu Cayman.
E sospechoso tabata bastante altera na momento di su detencion y ni maske cuanto polis a purba papia trankil cu ne, toch esey no a yuda. No a keda e defensornan di ley ningun otro opcion, cu detene e sospechoso y transport’e pa Ward’i Polis pa ey purba atende cu ne riba su actitud.
