Despues di ta 4 luna na Venezuela riba 3 di juli e tres piscadonan Arubiano, Reangelo E. Stamper (Angelo), Franklin G. Vos (Frank) y Alberto R. Laveist (Robert), a yega Aruba bek. Ora nan a pensa cu e mala racha cu nan a pasa dor di dje na Venezuela a caba, nan a cuminsa haya yamada y mensahenan cu menasanan di morto y hende cu ta purba di saca placa di nan. Nan a purba di haci denuncia pero te awor recherche no a tuma nan denuncia, aunke e mensahenan riba Whastapp y Facebook ta papia pa nan mes. Pa e motibo ey y pa no tin ningun storia cu no ta cuadra cu berdad nan a dicidi pa ultimo biaha conta pueblo di Aruba kico a pasa e dia cu Pau Martijn a disparce.
Mainta trempan Angelo a baha e boto “Gislaine” na Savaneta. Eynan Pau tabata wardando riba dje pa nan sali bay pisca. Di eyan a bay Zeerover pa cumpra saco di ijs y awa. Di eyan a sali direccion di cabes di Aruba. Ora a yega cabes di Aruba a cuminsa baha e rosarionan pa cuminsa e slipmento di pisca. A core basta ora na cabes di Aruba.
Banda di 11’or a bay na pier di Rodgers Beach pa busca Frank y Alex van der Berg. Manera a acorda un dia prome, lo busca nan eynan ora nan caba di traha. Ora a yega pier nan tabata t’ey caba. Na pier a cuminsa controla ekiponan di dive. Di eynan a bay bek lama direccion Baho, un punto conoci entre Aruba y Venezuela cu ta den awanan internacional. Ora a yega Baho a cuminsa prepara lineanan y bolbe baha rosarionan pa slip picuda. Eynan a keda un par di ora.
Un poco despues di 1’or di merdia a subi e rosarionan y saca lineanan for di awa. Pau a cuminsa prepara pa su prome dive. El a baha y a duna e señal cu tur cos ta ok y cu e por bay fondo. Eynan a cuminsa tuma tempo, cu ta 90 minuut, locual un dive di 2 tanki ta dura. Eynan a keda staciona na e boei. E ora Angelo a cuminsa prepara su ekiponan pa free dive. Angelo a baha na mesun caminda unda Pau a baha pa cuminsa tira pisca. A resulta cu esey no tabata posibel pasobra e stroming tabata basta duro. Angelo a haci señal na Frank pa bin sac’e for di awa. Ora nan lant’e, Angelo a bisa cu e stroming ariba ta demasiado duro y no lo baha mas pa free dive y lo warda riba Pau. A staciona na e boei bek y spera e tempo pa Pau subi. Despues di 90 min Pau a subi y a his’e den boto. Pau a bisa cu e no a logra tira mucho cos pasobra e stroming mas abou den lama tambe tabata basta duro. A dicidi bolbe baha rosarionan y bolbe slip. Pau a dicidi di sosega e ora tempo cu e mester pa e decompress.
Un poco despues di un ora Pau a lanta for di soño y Frank a yud’ pa pone su ekiponan di nobo. A lanta e rosarionan bek for di awa y bay bek direcion di boei. Eyan Pau a baha bek cu dos tanki, algo despues di 4 or. Despues di un rato Angelo a bay den awa cu su ekipo di free dive pa check cu tur cos ta ok cu Pau. A wak Pau den fondo cu a caba di tira un pisca. Angelo a subi bek den boto. A bay bek y staciona na e boei pa tin miho bista pa ora Pau subi. Asina a keda warda pa Pau subi. E ora a yega pa Pau subi, pero e no a subi. Angelo bolbe bay den awa pa wak kico a pasa y dicon Pau no subi. E no a wak Pau, pero si a wak su harpun personal den fondo di lama. Angelo a subi bek den boto. Ora e kier yama tera a resulta cu e telefon satelital no tabata den su caha. Solamente e celular personal di Pau, su bril y su cartera tabata aden.
A cuminsa haci buskeda rond di boei pero no haya ningun señal di Pau. Ora a cuminsa bira scur y gasolin a cuminsa caba, a dicidi di yega mas cerca di Aruba pa haya contact cu autoridadnan via telefoon normal. Angelo a yama A.P.A. y eynan buskeda di autoridadnan a cuminsa. A yega tera na Rodgers Beach pa tank y nan kier a bay bek. Na prome instante polis no tabata kier a laga nan bay bek, pero despues di un rato tog a laga nan sali bek y solamente Alex a keda tera na e momento ey. Finalmente a yega tera bek banda di 3’or di diadomingo mainta y a bay sosega un rato.
Despues cu e noticia a sali cu Pau tabata perdi, mesun diasabra anochi Robert tambe a sali busca Pau riba lama cu su boto. Diadomingo mainta banda di 8’or a bai busca Angelo pa sigui cu e buskeda. Hunto cu Frank a subi lama bek.
Dialuna mardruga 3’or nan a yega pier di Zeerover sin haya Pau. Frank y Angelo a bay sosega pa sali bek mas laat y Robert a keda na pier. Dado momento a drenta un yamada di Colombia na e celular di un señora cu Robert conoce como señora Rosita, cu ta ruman muhe di Pau. Aparentamente nan a bis’e cu nan a localisa Pau y e ta den mangrove pega na costa di Castelletes na Colombia. Eynan e casa di Pau a suplica Robert pa yud’e y sali bay busca Pau. Robert a puntra ken a duna e informacion. Señora Rosita a bisa cu un hende di search y rescue na Colombia a haya señal di e telefon satelite di Pau y cu e señal ta moviendo, pero na Colombia nan no lo sali prome cu 9’or di mainta pasobra lama ta hopi bruto. Mas hende na pier a cuminsa pidi Robert pa bay. Robert a bisa mester papel di ZARPE pa por sali y pasa den awanan di Venezuela. Via Wilfred Martijn a haya contact cu minister Bikker y pa 5.30 or minister a yama na celular di Wilfred Martijn y bis’e cu por pasa esaki na Barcardera pasobra tur cos ta regla pa por sali.
A contact Angelo y Franklin pa bin y a bay Barcadera pa klaar uit y nan a sali rumbo Castelletes, Colombia. A haci buskeda di Punta Spada, pasando costa completo di La Guaijra te cu yega na cuminsamento di Castalletes, na e punto unda a detecta e señal. Tabatin contact continuo cu e base di Guarda Costa Venezolano na frontera entre Venezuela y Colombia banda di Los Monjes na Colombia. Lama a bira mahos y a pidi pa manda un guia pa yuda nan yega tera. A yega un boto chikito cu dos persona cu a puntra si nan ta e hendenan di Aruba cu ta buscando un amigo perdi. Nan a confirma esey y nan a bisa pa sigui nan pa yega tera.
Ora di yega tera, pensando cu a yega Colombia, a hiba nan na un pier. Eynan a topa cu un tal señor Jose cu tabatin contact cu famia di Pau y tambe cu señor Eric Mansur. Señor Jose a conta nan cu a haya Pau na Punta Spada, pero ora el a yega hospital di Rio Hacha e lo a fayece. Nan a puntra ki ora Pau a wordo haya y a haya como contesta rond di 2.30 di merdia. E piscadonan a haya esey un poco straño y a puntra si nan por haya confirmacion di esey. Sr. Jose a yama Eric Mansur cu su celular y señor Mansur a confirma na Robert cu en berdad Pau a wordo localisa, pero cu el a fayece na Rio Hacha y cu su sobrino, Andrew Martijn, lo bin Colombia cu avion pa reconoce e curpa. E ora nan a wordo bisa pa nan laga e boto atras cu señor Jose y nan lo wordo hiba na Colombia via mondi pa asina bin bek hunto cu e curpa di Pau den avion.
Despues di esey Guardia Nacional di Venezuela a yega riba nan y e ora ey a compronde cu no ta na Colombia nan ta, pero na Venezuela. E momento ey a detene nan y e caminda di cruz di 4 luna di incertidumbre a cuminsa cu a finaliza dia 3 di juli ora nan a logra yega Aruba bek.
Reangelo E. Stamper,
Franklin G. Vos
Alexzander Junior van den Berg
Alberto Roberto Laveist
