Ministerio Publico conoce e retonan grandi relaciona cu dump y pikimento di sushi, pues cu medio-ambiente y naturalesa aki na Aruba. Particularmente pa habitantenan di Parkietenbos y vecindario. Na aña 2021 Ministerio Publico a ricibi denuncianan tocante e molester di dump y e incinerator, cu a drenta na uzo e aña ey.
Ministerio Publico ta conclui en conexion cu esaki cu legislacion riba tereno di naturalesa y medio-ambiente na Aruba ta cana tras: E Hindervergunning ta data di 1988, tin apenas leynan y reglanan y no tin hindervergunning pa e dump na Parkietenbos. E ultimo aki ta hiba na un hecho castigabel. Ministerio Publico tabatin contacto recientemente tocante esaki cu Minister di Naturaleza. Pa e incinerator si a duna un hindervergunning.
Riba dia 2 di februari, Procurador-General di Aruba a papia cu mr. Anouk Balentina relaciona cu su denuncianan. A informa Balentina cu pa awor Ministerio Publico lo no duna boet pa e hecho cu a sigui laga e dump funciona sin un hindervergunning.
Tin varios rason pa e decision aki. Un di nan ta cu e dump ta den funcion pa mas cu 60 aña caba y desde 1988 sin hindervergunning, es decir 34 aña largo. Ta Ministerio Publico su tarea pa investiga y persigui hechonan castigabel, pero e punto di salida ta semper cu e uzo di ley penal ta e ultimum remedium. E ta algo cu ta wordo uza ora a purba tur e otro posibilidadnan. Na huicio di Ministerio Publico esey no a pasa.
E hinderverordening di 1988 ta duna posibilidadnan si pa limita e molester door di gobierno. Ademas dunamento di un boet lo no soluciona e problema di dump y di e habitantenan di Parkietenbos. Pa soluciona esey mester di otro tipo di solucion y di solucion fundamental.
Pa loke ta trata e planes di gobierno riba e tereno aki, Ministerio Publico ta constata cu e Minister di Naturalesa a indica varios biaha publicamente cu e lo kier tuma pasonan concreto pa loke ta dump, pikimento di sushi y medio-ambiente y naturalesa di Aruba y cu e minister ta reuni cu parlamento, varios stakeholder y habitantenan, pero cu esaki lo ta un proceso largo. Los di e plannan aki Ministerio Publico ta di opinion cu mester bin claridad rapidamente tocante un hindervergunning pa e dump, aunke Ministerio Publico ta compronde cu lo costa tempo. Na fin di 2022 Ministerio Publico lo considera di nobo e decision pa cu e denuncianan.
