E plan hotelero Pen Resort a haña perspektiva nobo ku firmamentu di un franchise agreement ku Autograph Collection Hotels (AC).
E kadena di hotèl aki ta un kategoria luhoso spesial di hotèl di klase, pertenesiendo na Marriott International. E konvenio aki ta fasilitá e proseso pa finalisá finansiamentu di kontrukshon di e hotèl ku ta konektá e distrito di Pietermaai ku Pèn.
Esnan ku a pone nan firma tabata (riba potrèt drpd) e direktor-doño Bastiaan Guis, Bojan Kumer Vise Presidente di Marriott International pa Karibe i Amérika Latino, i Jeroen Kibbelaar, Direktor di Pen Resort BV. Pa e kontaktonan ku señor Guis komo desaroyadó tabatin ku Marriott pa nan sigui operá e hotèl na Parasasa ora e renobashon grandi kaba pronto, Autograph Collection a bini dilanti komo ‘franchise brand’ pa e hotèl nobo ku lo konstruí na kuminsamentu di Pèn. E tempu aya a skohe pa hasi Pen Resort un hotèl luxury inclusive, un merkado ku ta kresiendo rònt mundu, inkluso den Karibe.
Proyekto hotelero
E plan pa e hotèl ta enserá un hotèl luhoso di 283 kamber, ku ta inkluí 12 suite luhoso. E proyekto ta kubri e área entre Seru Bonito na e parti pabou i e anterior Kas di Pueblo na e parti pariba. Lo renobá ámbos edifisio históriko i ta integrá nan den e proyekto. E hotèl lo tin sinku restorant, servisio kompleto di spa, un sentro di fitness, subimentu di muraya, salanan di rekreashon, klup di hóben, kuido pa mucha, baiskel, aktividatnan di deporte akuátiko i un sentro di bushi. E wéspetnan por distraí alo largu di e pida kosta di 255 meter largu na un playa di 2600 meter kuadrá òf na un di e pisinanan.
Puesto di trabou
Den e fase di konstrukshon e proyekto lo krea empleo pa 180 trahadó i ora e hotèl ta den operashon alrededor di 330 hende lo haña empleo fiho nobo, sin papia ainda di e alrededor di 115 empleadonan temporal. Bou di e bandera di Marriott Kòrsou lo bira mas konosí ainda den e merkado di Nort i Sur Amérika. Realisashon ta nifiká tambe ku lo konservá dos edifisio monumental den stat i ta un mehoransa grandi di e imágen di e área di Pèn i Pietermaai Smal.
