E empleadonan di Centro Multidisciplinario (MDC) tambe a pone trabao abao pa un ora, mustrando asina nan mal contento pa loke ta e recorte di 12.6%.
Ya parti mainta departamento di GKMB como tambe Imeldahof a pone trabao abao pa un ora.
Un empleado di MDC a comenta cu nan no ta contento cu e situacion actual. E 12.6% a corta den tur hende nan existencia, cu ta pone cu hopi cos no por a haci mas.
Na MDC nan mes a cuminsa pa basta tempo caba cu recorte riba articulo di uzo diario, manera papel, etc. Nan a purba di economisa riba esaki, pasobra ya caba cos ta tiki preta.
Nan ta uni nan mes n’e trahadonan publico y semi-publico cu tin e mesun situacion. Tur ta den e mesun boto y tin di wak pa tur por sali dilanti hunto.
Claramente no tin progreso sin sacrificio, el a comenta.
E situacion ta malo, e empleado a bisa y a agrega cu tin comprension pa loke gobierno ta pasando aden. Tambe nan tin comprension p’e situacionnan global di cual no tin ningun clase di dominio riba dje.
Pero actualmente tin mensahe contradictorio. Manera cu e minister di finansa a bisa dialuna, no mester wak kico a bin prome of kico a bin despues, si t’e webo of galiña.
Den e situacion aki no ta mira ni webo ni galiña. Ta purba di wak e omelet. Mester por haci algo. Semper por tin awa den biña y semper mester por tin dialogo pa por yega un caminda. Esey ta loke ta ponencia di e empleadonan.
Pa un cobertura mas amplio lesa e edicion di TREMPAN di mañan.
