“Nos no tin comentario”, asina Ann Angela, vocero di Ministerio Publico a contesta nos riba e pregunta, dicon a cambia nomber di e investigacion. Si e relacionista publico di Ministerio Publico a confirma cu a cambia e nomber di e investigacion cu antes tabata conoci como “aloe” pa “kukwisa”. Aunke ambos nomber ta di e mesun tipo di mata, toch a hal atencion cu a cambia nomber di e investigacion rond di e proceso di otorgamento di tereno na Departamento di Infrastructura y Planificacion (DIP).
Mester menciona cu for di algun luna pasa caba a start e investigacion pero ainda no a señala un sospechoso. Si Ministerio Publico a confirma cu a drenta DIP y a confisca computer y documentonan. E hecho cu a bay cu computer di un ex-parlamentario, no ta bisa nada ainda pasobra no tabatin detencion y husticia no ta bisando kico ta locual ta buscando ni kende(nan) ta e sospechosonan.
Mester menciona cu den pasado ex-minister Marisol Lopez-Tromp a yega di entrega keho of a entrega documentonan sospechoso na Landsrecherche pa investigacion. Djey a cuminsa papia di e caso Aloe, cu ta duna indicacion cu procurador general a haya suficiente motibo y prueba pa start cu un investigacion formal rond di e proceso di otorgamento di tereno.
E caso aki a cuminsa despues di esun contra ex-minister Benny Sevinger y ex-minister Otmar Oduber. Ta dos otro minister a keda encarga cu e cartera di infrastructura despues di salida di Otmar Oduber. Nan ta Marisol Lopez-Tromp cu a keda pa algun luna den e funcion y sigui su tras pa Evelyn Wever-Croes. Pero como cu husticia no ta papiando di ki sorto di investigacion ni ken ta e sospechoso(nan), ta dificil pa por deduci den ki direccion e caso “Kukwisa” aki lo bay.
