A pidi presencia di ambulance mesora na crusada riba caminda di Tarabana pa un persona cu probablemente a bira malo tras di stuur y ocaciona un accidente. E persona aki lo a subi caminda y bay dal den vehiculo riba caminda di preferencia causando basta daño material.
Esaki a sosode un poco despues di 10:00 am riba Caya Betico Croes na altura di Cayena Mall. Un dama tras di stuur di un Suzuki blanco biniendo for di Rooi Manonchi a subi caminda di preferencia y bay dal den un Toyota preto maneha tambe pa un dama.
Na sitio a bin compronde cu e chauffeur di e auto blanco lo a bira malo tras di stuur y a sigui core, subi caminda grandi y bay dal den e vehiculo menciona. Ambulance cu a presenta a cuminsa trat’e mesora na sitio pero un rato despues a opta pa transport’e pa hospital.
Polis tabatin e area cera un bon rato pa asina sigura cu e situacion den trafico ta sigur pa tur envolvi.
