Diabierna mainta riba caminda principal L.G. Smith Boulevard, riba e brug di lagoen banda di e Cas Ceremonial di Gobernador, a sosode un accidente pisa, den cual un hende muhe a resulta herida. Esaki a tuma luga den careda di 9:15 am ora un vehiculo a lora dilanti un otro y a dal fuertemente contra dje. Tabata entre un auto marca Suzuki modelo Swift color preto y un auto marca Chevrolet modelo Comfort color di oro.
Den e auto preto tabatin tambe un criatura cu a keda basta spanta y tabata yora den forma inconsolabel, te ora cu su mama a presenta na sitio. E herido tabata un pasahero sinta parti patras cu a haya sla na cabes y a rekeri di atencion medico.
Ambulance a presenta na sitio y atende mesora cu e victima mientras polis a cera caminda y desvia trafico un rato. Chauffeur di e otro vehiculo a duna di conoce cu el a caba di traha un shift di 11:00 pm – 7:00 am y a pega soño tras di stuur. Daño material tambe ta considerabel.