Un persecucion formal a tuma luga awe den oranan di atardi cu a finalisa den bario di Jaburibari, lagando basta hende spanta.
E hecho aki a sosode rond di 4’or di atardi.
Polis tawata persiguiendo un pick-up blanco cu cement kibra den e baki. Polis na diferente ocasion a purba pa para e vehiculo, pero e chauffeur masculino a nenga. Esaki a causa cu a dura un rato prome cu a logra par’e. Esaki a sosode na momento cu el a drenta un caya sin salida, na Jaburibari, probablemente door cu e no conoce e bisindario.
E chauffeur a baha di e vehiculo y a sigui core na pia, drentando un mondi. Mesora polis a baha tambe y a drenta mondi y den un cera di wowo ya e meneer aki tawata deteni. A pidi dogcatcher y a bay cu e pick up den un grua.
Awo ta averigua pakico el a trata di huy di polis y naturalmente ta bay controla su datonan.
