Un persona a resulta herida despues di accidente basta pisa riba Avenida Nelson Orlando Oduber (ex-Sasaki) den ora di marduga. Daño material no solamente na e vehiculo tabata substancial, pero tambe riba e caretera.
E accidente a tuma luga den careda di 2:35 am, poco despues di rotonde di Palm Beach direccion Playa, caminda un Chauffeur di un Honda Fit lo a perde control di su vehiculo, ranca un pal’i luz y bolter cu esaki.
A pidi presencia di polis mesora na sitio pa asina cera e caminda y atende cu e accidente. E chauffeur a resulta herida y presencia di ambulance tambe tabata necesario. Afortunadamente no a resulta den un desgracia mayor, mirando e magnitud di e accidente.
Na e sitio a presenta mayor/familiar di e chauffeur, visibelmente preocupa y asimilando tur e daño causa resultado di e accidente aki. No a menciona cu e chauffeur tabata bou influencia, pero mas cu claro ta algo cu polis lo test p’e.
