Caquetio Chess Club ta organizando su Pepernoten Toernooi, den cuadro di e celebracion di Sinterklaas, diasabra 2 december, di 09:30 am – 05:00 pm, na Caquetio Chess Club, Wilhelminastraat 105. Muchanan cu ta practica ahedres na Caquetio Chess Club, cu dia 1 januari 2017 no tawatin 12 aña ainda, por participa.
Un total di 34 mucha a registra diasabra siman pasa. Ta wordo hunga den dos categoria; Girls U-12 y Boys U-12. E participantenan lo hunga 5 partido, di 30 minuut pa banda, segun e sistema Suizo. Den tur dos categoria lo hunga e muchanan mas fuerte na Aruba, bou di 12 aña. Un torneo di nivel. E muchanan cu termina na e di prome tres puestonan, den cada categoria, lo ricibi un trofeo durante e entregamento di premio. Y tambe tin 4 medaya disponibel pa Best U-10 player, second Best U-10 player, Best U-8 player y second Best U-8 player.
Caquetio Chess Club lo ta dorna na Sint & Piet y lo tin mas cu suficiente pepernoten pa tur participante por saborea. Pietnan lo pasa pa bin wak e muchanan hunga y saca potret. E torneo aki ta valido pa e Caquetio ratings. Interesadonan y amantenan di ahedres ta keda cordialmente invita pa pasa wak e partidonan. Caquetio Chess Club ta desea tur e participantenan hopi exito!
