Diasabra awor, 18 di juni, pa 4:00 di atardi den Cas di Cultura, varios alumno di Scol di Musica Rufo Wever, bou di guia di e docentenan, lo brinda e amantenan di bon musica nan concierto di fin di aña escolar. Nan lo presenta un programa varia den estilo y combinacion di instrumento pa cera e aña escolar 2021/2022.
Nan lo interpreta diferente cancion crioyo, regional y tambe internacional. E alumnonan lo demostra nan habilidad riba diferente instrumento, entre otro orff, piano, baho, guitara, cuarta, drums, percusion, fio, trompet y tambe canto. Lo presenta den grupo chikito, grandi y tambe como solista. Carchi ta obtenibel cerca administracion di Scol di Musica Rufo Wever na Cas di Cultura piso ariba y na porta dia di e concierto.
