E dos palabranan integridad y screening ta masha na moda, tur caminda bo ta mire, y scuche, e ta punto di discuccion, a hasta a sali un ley pa haci e palabranan bira hecho.
Pero nos bida dilanti di Dios no ta depende di un integridad temporal di 4 aña , ni tampoco pa sinta riba un stoel, of pa un posicion cu nos ta bay ocupa, no absolutamente cu no.
Bo tabata sa cu Dios NO ta screen ningun hende pa drenta su Reino,(Romanos 3:23) y tur cos ta a base di e decision cu nos tuma awor cu nos ta na bida, pa nos biba pa Señor, pero no tur hende ta di acuerdo cu esey, pasobra e bida carnal y deseo pa scuridad y inmoralidad ta asina grandi ,( Colosenses 3:5-7) cu nan ta kere den nan mes y ta rechasa boluntad di Dios.( Lesa Dios su CONDICION Galatas capitulo 5 vers 19 te cu 21) y si bo no ta di acuerdo cune , cu arepentimento lo bo alcanse sigur.
No ta solamente ministernan mester ta integro , pero henter nos población mester ta integro y biba un bida cu ta agrada Dios, y nos no por pone nos confiansa den hende, pasobra hende por faya, pero nos tin cu sigi Hesus Cristo kende ta Fiel y berdadero.
Awor nos ta bay pa e di dos CONDICION pa tur hende ta na altura y no keda pega den tempo: Hebreonan Capitulo 12 vers 14 te cu 16 e ta bisa asina: Aspira pa tin paz cu tur hende y santificacion, sin cual ningun hende lo mira Señor. Mira pa ningun hende no keda sin alcansa e gracia di Dios, pa ningun rais di amargura no spreit y causa problema y door di esaki hopi wordo contamina.Pa no tin ningun hende inmoral of sin Dios manera Esau, kende a bende su mes derecho di nacemento pa un solo cuminda.
E di tres CONDICION ta 1 Corintionan 6 vers 9 te cu 11 por favor lese y medita riba dje.
Awor tur 3 CONDICION aki mester ta conoci den tur cas, pa Mayornan avisa nan yuinan , pasobra aki nan bo no por usa e dicho’’ Esun cu ta sin pica tira e prome Piedra, y ni tampoco Gruña pa hende no huzga bo, pasobra esakinan ta CONDICION estableci door di Dios pa drenta Su cas, y no condicion terenal estableci door di hende.
No fiesta cu dolor di otro hende.
Siña pordona di curazon y laga pasado bay.
Corda bon cu Orguyo, Rabia y Odio y Falta di Pordon ta e 4 ingredientenan pa Amargura.
No biba den inmoralidad ni tampoco apoya inmoralidad.
No bende bo integridad pa ningun posicion.
David ta bisa den Salmo 41 vers 12 : Ma pa loke ta ami Bo ta sostenemi den mi integridad y bo ta ponemi den bo presencia pa semper.
Cristo Hesus ta duna oportunidad pesey e ta bisa den Mateo 11 vers 28 bin sercami tur cu ta cansa y carga y lo mi duna boso sosiego.
Dios ta sostene nos integridad.
