Awe den parlamento a trata e ley di prijs di producto pa proteccion di consumido. A busca pa amplia esaki den e area di proteccion p’e consumido basa riba un cambio den e prijverordening, cual ta un ley conoci pa hopi tempo caba, representando e base pa por ehempel e canasta basico y prijs di gasolin.
Riba esaki, minister mr. Geoffrey Wever a bisa cu e ampliacion aki ta duna e ministerio y e minister di asuntonan economico y e departamento concerni un autoridad mas amplio pa reenforsa dicho ley. Pues prome por ehempel ora cu e controladonan ta acudi pa controla cierto establecimento pero nan no por actua, pues legalmente no por impone un boet of cera un luga, esaki tabata den poder di cuerpo policial. Awo sinembargo, a dicidi pa duna e departamento en cuestion mes e poder aki, por ehempel pa impone boet.
Wever a sigui splica cu ta dos cambio fundamental a amplia cu ne. E prome ta e ‘last onder dwangsom’ y e otro ta e parti di boet. ‘Last onder dwangsom’ ta encera cu por emiti un decreto den cual por bisa un establecimento cu por ehempel esaki tin cu cumpli cu e prijsnan den e canasta basico, por ehempel pa luga cu ta bende dicho producto na un prijs mas halto awo por haya un decreto cu ta bisa nan cu nan tin un obligacion pa aplica e prijs di canasta basico y si no mester paga un suma y si comete cierto infraccion lo por haya un boet di maximo 25.000 florin.
Pa cobertura mas amplio lesa edicion di TREMPAN mañan.
