Den buki di Malaquias Capitulo 2:16 ta para skirbi: Pasobra mi ta odia divorcio, Señor di Israel ta bisa y esun cu ta tapa su paña cu violencia. Asina ta para skirbi pa tur esunnan cu ta causa, apoya y participa den violencia domestico y divorcio. Ningun hende cu ta yama su mes Cristian, no por ta batido di muhe of maltrata famia den ningun forma 1 Pedro 3:7.
Pa hopi tempo violencia domestico y divorcio a bin ta aumenta drasticamente. Ta parce manera tin hende cu tin placer den maltrato di nan pareha, pero Dios ta aborece nan actuacion. Esaki ta nifica cu un hende cu ta comete of ta causa violencia domestico sea e ta homber of muhe no tin un bon relacion cu Dios. A yega e tempo pa desenmascara tur maltrato pa medio di e palabra di Dios, pa asina por bin un paro di violencia den hogar. Santiago 1:26 ta para skirbi: Si un hende ta kere cu e ta religioso y toch no por frena su lenga, ma ta gaña su mes curason y su religion ta sin balor.
Salmo 37:27 ta bisa: Aparta bo mes for di maldad y haci loke ta bon asina lo bo biba pa semper. Pero tin hopi cos cu hende mester divorcia for di dje pa asina evita cu nan ta yega na violencia domestico y divorcio Aunke e pensamento aki ta parce anticua y cu hopi hende no kier mantene na dje, e palabra di Dios ta bisa cu cada homber mester tin un muhe solamente pa evita inmoralidad y demostra temor na Dios, anto asina preveni maldad. Hende mester divorcia tambe for di droga alcohol, bruheria, adulterio, wega di placa y tur otro tipo di bicio cual ta provoca violencia domestico y divorcio.
Pero un cos cu ta kibra famia ta mentira, mentira ta algo hopi molestioso y tur caminda cu e aparece e ta parti di destruccion. Amor tin pasenshi, amor ta cariñoso, amor no ta jaloers, no ta gaña y no ta arogante. Tin hopi cos cu awendia ta yama amor pero ta materialismo. Hopi hende ta basa nan matrimonio riba beyesa, posicion, placa y makiyahe di integridad. Si un persona ta maltrata bo prome cu bo casa, ta imposibel pa bo casa of bay biba cu un persona asina. Den un divorcio no tin ganado, ni tampoco den violencia domestico no tin ganado. Tur hende ta perde, pero esun cu ta sufri mas ta e muchanan,
Cada biaha cu nos haci algo contra nos yiunan, nos a haci algo contra e palabra di Dios, pasobra Dios ta stima tur mucha. Cada biaha un persona ta infiel na den su matrimonio e ta infiel na Dios, pasobra Dios ta bisa den su palabra cu locual Dios uni no laga ningun hende separa. Mateo 19:6. Dios bendiciona tur matrimonio y famia.
