Awendia e palabra despensa a bira scars. Hopi hende ta cana cu otro riba nan curason. Hende ta evita di pidi despensa. Hopi biaha tin cu bay dilanti di hues, gasta placa en bes di simplemente pidi otro despensa.
Hopi matrimonio kibra, separa di cama y mesa, rumbo pa divorcio, pero cu un simpel despensa e matrimonio por restaura.
Hende ta bay cera pa brutalidad, of paga multa halto, pero simplemente cu un despensa bo por yega na un areglo cu e contrapartida. Hasta ora un polis para bo, pa un infraccion den trafico, cu bo a comete sin nota, e palabra despensa ta na su luga.
Bo a discuti cu bo esposa, palabra fuerte a cay. Y pa colmo boso dos a pusha otro dilanti di boso yiunan. E actitud ey ta exigi un despensa na boso yiunan. Pasobra esey tambe ta educacion. Reconoce bo fout y pidi despensa.
Bo a grita bo yiu y bo no tabatin rason. Bo a papia un insulto of hasta bo a pas’e un mep. Como mayor bo despensa na bo yiu tin hopi balor.
Ora nos ta pidi despensa, ta pasobra nos a haci un fout, pasobra despensa ta sali di curason. Un despensa cu no ta sali for di curason, ta falsedad, ta hacimento di cherche y mas cu tur cos e ta un pica.
Si bo a ofende un persona y bo sa sigur cu bo a hacie, bo no por bay cerca dje y bisa: Si acaso mi a ofende bo despensa mi. E forma di expresa di bo ta mustra cu bo no ta serio of bo ta sinti bo mas cu e persona. Of den un forma bruto bisa con cu bo kier bo tum’e. No laga arogancia domina bo curason.
Ta hopi lamentabel cu bao di nos hubentud e palabra despensa, ta bini masha poco dilanti. P’esey tin tanto violencia,maltrato y hasta crimen. Hopi mucha no a tende e palabra ey na cas. Y ora e maestro of maestra di scol bisa pa pidi otro despensa, e ta prefera di tuma straf of schorsing y te hasta yega asina leu di yama mayor bin scol pa un simpel despensa y keda bon cu otro.
Despensa ta demostra cu bo ta educa y cu bo ta sabi. Cu un simpel despensa no ta kita nada for di bo. Al contrario, Dios ta keda contento cu bo. Si bo mira dos hende para caminda bo mester pasa, pidi despensa, si bo haya dos hende ta papia cu otro y bo mester di un di nan pidi despensa, no ta importa, sea nan ta jong of di edad e despensa semper ta bini di bon boluntad.
Despues cu Jacob a horta Esau su bendicion (Genesis Capitulo 27) a yega e momento cu e mester a bay pidi su ruman despensa, pasobra esey ta boluntad di Dios. Y Dios mes a drecha e caminda pe, pa asina e por a drecha relacion cu su ruman.
Pero esey no ta sosode awendia den tur famia, pa motibo di orguyo, hopi famia ta dividi, algo a pasa y bo ta ripara con ruman cu ruman ta bira lomba pa otro y ta keda sin cuminda otro, ta pasa riba otro manera no tin educacion y pa mas extremo, ni morto den famia no ta pone nan reconcilia.
Bijbel ta avisa nos di e cosnan aki den 2 Timoteo Capitulo 3 vers 1 te cu 5, cu hende lo bira ireconciliabel, cu solamente ta pensa riba nan mes.
Dios a yama nos pa haci bon y biba bon cu otro. Romanonan 14 vers 19 ta bisa: Asina anto laga nos busca e cosnan cu ta trece Paz y edificacion di otro. Pasobra ora nos trata otro bon , nos ta haci Dios contento. Salmo 133. Despensa ta bal mas cu diamanta.
